၃၆၅ ရက်ပေါင်းခြင်း
တစ်နှစ်လို သတ်မှတ်ထားတဲ့တစ်နှစ်ထဲက
မေလ ဒုတိယပတ် တနင်္ဂနွေနေ့
ဝတ်ပြုခြင်းအစီအစဉ်မှာ ရင်ထိုးလှလှလေးထိုးပေးလို့
ရှေ့ဆုံးတန်းမှာ မေမေ့ကိုနေရာပေးမယ်
မေမေ့မေတ္တာဖွဲ့ သီချင်းလေးတွေနဲ့
ခံစားသီဆိုချီးမွမ်းကြ. . .
မျက်ရည်စက်လေးတွေနဲ့
တစ်နှစ်လုံးရဲ့ အမှားတွေကို
မိနစ်ပိုင်းလေးနဲ့ ဝန်ချတောင်းပန်လို့
ခဏလေးတော့ ငိုလိုက်ကြ. . .
ပြင်ဆင်ထားတဲ့လက်ဆောင်တွေပေးကြမယ်
မကုန်နိုင်တဲ့ မေမေ့မေတ္တာအကြောင်း
တရားတစ်ပုဒ်နာရင်း
ခဏလေးတော့ခံစားကြ
ခဏလေးတော့ ကြေကွဲကြ
ခဏလေးတော့ ဝမ်းနည်းလိုက်ကြ
ခဏလေးတော့ နှလုံးသားလေးပြင်ဆင်ကြ
ခဏလေးတော့ သားသမီးတို လိမ္မာလိုက်ကြ
ခဏလေးတော့ ကျေးဇူးတင်လိုက်ကြ
တကယ်ကို ခဏ
ခဏ. . .
ခဏ. . . လေးပါမေမေ. . .
ဓမ္မတေးတစ်ပုဒ်ရဲ့အဆုံးမှာ
မေမေများက လှိက်လှိက်လှဲလှဲ
(ရင်ထဲက) ကောင်းချီးပေးတော့
"အာမင်"ထူးသံက မြိုင်မြိုင်ဆိုင်ဆိုင်နဲ့ရယ်. . .
လုပ်နေကျပုံစံလေး ဖြစ်ပေမယ့်
တစ်နှစ်မှာ ဒီတစ်ရက်တော့ . . .
မေမေပျော်လိမ့်မယ်ထင်
တစ်နှစ်မှာ ဒီတစ်ကြိမ်တော့ . . .
မေမေကျေနပ်လိမ့်မယ်ထင်
တစ်နှစ်မှာ ဒီနာရီပိုင်းတော့. . .
မေမေ ပီတိအပြုံးလေးနဲ့ ခဏလေးတော့
အမောပြေလိမ့်မယ်ထင်
ဒီတဒင်္ဂလေးကို ရင်မှာသိမ်းလို့
နောက်တစ်နှစ်ပတ်လုံး
သားသမီးများနေ့အဖြစ်သို့ကျေနပ်စွာ
မေမေအသွင်ပြောင်းပေတော့မည်
မေမေ
"မေမေများနေ့ မိခင်များနေ့" ကိုလည်းလေ
ခဏလေးဖြစ်ဖြစ်
နေ့တိုင်းလုပ်ပေးနိုင်တဲ့သူဖြစ်ချင်မိတယ် ။. . .။
လိုင်ဂျီယာ
