ဝတ္လစ္စလစ်မြို့​တော်

ကိုယ်လုံးတီးကိုယ်ကျင့်တရား​တွေနဲ့

ကာကွယ်မယ်ဆိုတဲ့ကတိကို အရှက်မရှိတဖွဖွ​ပြော​နေတာ

ကာလနာ ​မြွေ​ပွေး​တောင် ကိုက်ရမှာရွံ့လို့

ကိုဗစ်နဲ့အတူ ကာလယန္တရားကြီးက​ခေတ်ပျက်ကြီးဖန်တီးလို့

ကူရာမဲ့လူ​တွေက ​ဖေ့ဘုတ်မှာဆဲသူဆဲ ငိုသူငို

ကပ်ပါး​ကောင်​တွေက​တော့ အိုတူး​တွေအလျှံပယ်ဆိုပဲ

ကြပ်တည်းပါတယ်ဆိုမှ ဥအတွက်တန်းစီ ​လေအတွက်တန်းစီ

ကြမ်းတမ်းတဲ့​နေ့ရက်​တွေက ပုံသွင်းဖန်များလာ​တော့

ကြား​နေကျဖြစ်လာတဲ့ငိုသံ​တွေက သံစဥ်လိုလို ဘာလိုလို

ကား​တွေက ​ရေ​​ဝေးမှာစည်ကားလို့ ငိုသံအစားအံကြိတ်သံ​တွေက ဂီယာညှပ်သလို ဂျစ်ဂျစ်နဲ့

​ကောင်းရာသုကတိမလားခင် ​ခေါင်းတိုင်ထဲမြန်မြန်​ရောက်ဖို့ကြိုးစား​နေရသူ​တွေက တုံးလုံးပက်လက်

ကြိုက်​စျေး​ခေါ်လို့ရတဲ့အထဲ အသက်​တွေမပါဘဲ 

ကစားလို့​ကောင်းတဲ့အသက်စျေးကွက်က အတက်သာရှိပြီးအဆင်းမရှိတဲ့​လေယာဥ်​တွေလို ပျက်ကျမှပြန်ဆင်းမဲ့ပုံပဲ

ကန့်ငရဲခန်းကို အိပ်ယာဝင်ပုံပြင်ထင်​နေတဲ့လူတချို့က

ကြွကြွရွရွ​လေးနဲ့ ​အောက်စီဂျင်အလုံအ​လောက်ရှိပါတယ်ဆိုပဲ

​ကြွေသင့်သူမ​ကြွေ ​ဝေသင့်သူ​​ကို​ခြွေ​နေတဲ့နာရီလက်တံကို ဘယ်သူရပ်တန့်​ပေးမှာလဲ

ကြမ်းကြဲကြဲကြား ​မေတ္တာကျွံမိတဲ့ဘဝ​တွေက နှုတ်မရ

ကာကွယ်စရာဆိုလို့ ကွန်ဒုံးတောင်စိတ်မချရ​တော့တဲ့အတ္တ​ရောဂါက

ကျားသူ​တော်ကြီးကို ဥပုသ်​စောင့်ခိုင်းဖို့ဆု​တောင်း​နေသလိုပဲ

ကဲ..... ကြားကြပါ​လော့... ​နောင်တရကြပါ​လော့

က​နေ့သည် စီရင်ရာ​နေ့ဖြစ်သည်ဆိုတဲ့ စကားမဟားကြ​လေနဲ့

က​နေ့သည် ​မျှော်လင့်ရာ​နေ့ဖြစ်တယ်ဆိုတာ မ​မေ့ကြ​လေနဲ့

ကိုယ့်လိပ်ပြာ​လေးလုံဖို့ အဝတ်မပါရင်​နေ ​

​ကျေးဇူး​တော်​ခြုံထည်ကို မြဲမြဲခြုံကြ လုံ​အောင်ရုံကြ

ကရုဏာခွက်ဖလားကို သွန်မပစ်ကြနဲ့​ဟေ့

မရဏာသာ

ကလောင်ရှင်အား တိုက်ရိုက် စာမူခ (Love Gift) ချီးမြှင့်လိုလျှင် 

+959 799 829 868 [Phone No.]

Website - https://www.devoshipjournal.com

Telegram - https://t.me/devoshipjournal , https://t.me/malak_devo