ကိုယ့်မှာမရှိတိုင်း
သူတပါးရှိခြင်းကို မကဲ့ရဲ့သင့်ဘူး
ကိုယ်ရှိတိုင်းလည်း
မရှိသူကို အထင်မသေးသင့်ဘူး
ကိုယ်မပိုင်ဆိုင်တိုင်း
သူများပိုင်ဆိုင်မှုကို ဝန်မတိုသင့်ဘူး
ကိုယ်အပိုင်ရထားလည်း
မပိုင်ဆိုင်တဲ့သူကို
မထီမဲ့မြင် မပြုသင့်ဘူး
ကိုယ်မကြုံဖူးတိုင်း
နာကျင်နေသူကို ဟားတိုက်မရယ်သင့်ဘူး
ကိုယ်ခံစားရတယ်ဆိုတိုင်းလည်း
ကိုယ့်အပေါ်နားလည်မပေးနိုင်သူကို
ဗွေမယူသင့်ဘူး
ကိုယ့်ဆုတောင်းချက် အဖြေမရတိုင်း
ဆုတောင်းပြည့်သူကို မျက်စောင်းမထိုးသင့်ဘူး
ကိုယ့်ဆုတောင်းချက် ပြည့်နေတိုင်းလည်း
အဖြေမရတဲ့သူကို မပုတ်ခတ်သင့်ဘူး
ကိုယ်ရတာမှ ကောင်းချီးအစစ်လို့
ထင်တတ်ရင်
သူများရနေတာတွေကလည်း
ဘုရားဆီကလာတဲ့ ကောင်းချီးတွေပဲဆိုတာ
လက်ခံတတ်ရမယ်
ဘုရားက ကိုယ့်ကို မထိုက်မတန် အသုံးပြုနေသလို
သူ့ကိုလည်း ဘုရားက မြေမှုန့်ထဲကနေ ရွေးနှုတ်ပြီး
ချီးမြှောက်နိုင်တယ်ဆိုတာ ဆင်ခြင်ပါ
ဘုရားက ကိုယ့်ကိုမှ အချစ်ဆုံးလို့
မာန်တက်နေတတ်ရင်
သူ့ကိုလည်း ဘုရားက အသက်ပေးချစ်တယ်တယ်ဆိုတဲ့
သမ္မာတရားကို နှိမ့်ချစွာ သတိရလိုက်ပါ
ကိုယ့်ယုံကြည်ခြင်း levelမြင့်တယ်ဆိုပြီး
မာန်မာနတက်လာတဲ့အခါ
ကိုယ်တိုင် ယုံကြည်ခြင်းအားနည်းခဲ့ဖူးတဲ့
သင့်ရဲ့ဝိညာဉ်ရေးရာ နုနယ်စ အတိတ်ကာလကိုလည်း
ရူးချင်ယောင်ဆောင်ပြီး ဘဝမမေ့ပစ်ပါနဲ့
လူတိုင်းဟာ တနေ့စာဖြတ်သန်းရတဲ့
ရုန်းကန်မှု levelတွေ မတူညီကြသလို
ရင်ဆိုင်တုန့်ပြန်ရတဲ့ ဗျူဟာတွေလည်း မတူကြဘူး
ဒီလိုပါပဲ
စိတ်အာဟာရအတွက် သုံးဆောင်ရမယ့်
ဓာတ်စာတွေလည်း ခြားနားကွဲပြားတတ်မှာဖြစ်သလို
ဝိညာဥ်အာဟာရအတွက် ဖြည့်စွက်ရမယ့်
ဝမ်းစာတွေလည်း သူ့လိုအပ်ချက်နဲ့သူ
တဦးနဲ့တဦး မတူညီနိုင်ကြလို့ပါပဲ ။
မာရီယာ
ကလောင်ရှင်အား တိုက်ရိုက် စာမူခ (Love Gift) ချီးမြှင့်လိုလျှင်
+959 795 718 428 [KBZPay]
Website - https://www.devoshipjournal.com
Telegram - https://t.me/devoshipjournal , https://t.me/malak_devo
