My father name is U Baလို့
ငါတို့ဆရာမက တတန်းလုံးကိုရေးခိုင်းတော့
ငါဘာလို့ U Ba လို့ရေးရမှာလဲ
ငါအဖေက ဦးဘမှမဟုတ်တာ။
ငါတို့တတန်းလုံး
ငါတို့အဖေတွေအဖြစ် ဦးဘလို့သတ်မှတ်တဲ့အချိန်
ငါတို့တတွေ အဘတုတွေရဲ့ ဖိနပ်အောက်မှာ လက်အုပ်ချီရင်း
ငါ့အဖေဘယ်သူလဲဆိုတာ သံသယဖြစ်ရင်း
ငါအမှန်တရားတွေကို တွေဝေငေးကြည့်ရင်း
ငါကြောက်နေခဲ့တယ်။
ငါကြောက်ရင်းကြောက် ကြောက်ရင်းကြောက်နဲ့
ငါကြောက်ရမှာတောင် ကြောက်လာတဲ့တနေ့တော့
ငါ့အကြောက်တရားက ငါ့ကိုသတ္တိရှိစေခဲ့တယ်။
ငါစာမေးပွဲကျမှာကြောက်နေခဲ့တယ်
ငါ့ကိုလက်မခံမှာ ကြောက်နေခဲ့တယ်
ငါ့အတန်းထဲမှာအကြဥ်ခံရမှာ ကြောက်နေခဲ့တယ်
ငါ့ကိုထူးဆန်းတဲ့အကြည့်တွေနဲ့ကြည့်မှာ ကြောက်နေခဲ့တယ်
ငါ့အသက်ရှုသံတွေတောင် သစ္စာဖောက်တော့မဲ့အချိန်
ငါကြောက်နေခဲ့တယ်။
ငါကြောက်ရင်းကြောက် ကြောက်ရင်းကြောက်နဲ့
ငါကြောက်ရမှာတောင် ကြောက်လာတဲ့တနေ့
ငါ့အကြောက်တရားက ငါ့ကိုသတ္တိရှိစေခဲ့တယ်။
ငါအခုထိကြောက်နေဆဲပါ ...
ငါတကယ်ကြောက်နေဆဲပါ.... ဒါပေမဲ့
ငါတကယ်ကြောက်တာက
ငါ့လိပ်ပြာကို ငါသစ္စာဖောက်မိမှာ ကြောက်တယ်။
ငါ့ရပ်တည်ချက်တွေ ယိုင်နဲ့သွားမှာ ကြောက်တယ်။
ငါ့အိပ်မက်တွေ အခိုးခံရမှာ ကြောက်တယ်။
ငါ့အနာဂတ်တွေ နင်းခြေခံရမှာ ကြောက်တယ်။
ငါ့မှန်ထဲကငါ့ကို မုန်းမိမှာ ကြောက်တယ်။
ငါကြောက်နေခဲ့တယ်။
ငါကြောက်ရင်းကြောက် ကြောက်ရင်းကြောက်နဲ့
ငါကြောက်ရမှာတောင် ကြောက်လာတဲ့တနေ့
ငါ့အကြောက်တရားက ငါ့ကိုသတ္တိရှိစေခဲ့တယ်။
ငါရေးချလိုက်တယ်
My father name is U Zaw Hlaing.
မရဏာသာ
