သေနေကြပြီ
သေစေဖို့ပြင်နေကြပြီ
သေနတ်တွေတပြင်ပြင်နဲ့ပေါ့။
သေနတ်က
သေစေတဲ့နတ်ဆိုးလား။
သေစေကြတာတွေက
သေနတ်ခလုတ်ဆွဲခိုင်းတဲ့အမိန့်တွေ
သေနတ်ကိုမောင်းဖြုတ်စေတဲ့ အကြောက်တရားတွေ
သေနတ်ကိုင်တဲ့သူကို ဝင်ပူးတဲ့နတ်ဆိုးတွေ။
သေစေကြပြီ
သေနေကြပြီ
သေနတ်ဆိုးတွေမွှေနေကြပြီ
သေနတ်ဆိုးတွေသတ်နေကြပြီ
သေနတ်ဆိုးတွေသောင်းကျန်းနေပြီ။
သေနတ်ဆိုးတွေကို ဘယ်သူဝင်ခွင့်ပေးတာလဲ
သေနတ်ဆိုးတွေလက်ထဲ ဘယ်သူအာဏာအပ်လိုက်တာလဲ
သေနတ်ဆိုးတွေကို ဘယ်သူသတ်မလဲ
သေနတ်ဆိုးတွေကို ဘယ်သူတားမလဲ
သေနတ်ဆိုးတွေကို ဘယ်သူနှိမ်နင်းမလဲ။
သေစေကြတဲ့
သေနတ်ဆိုးကို ဖြိုခွင်းကြဖို့ထကြ ... ထကြ
သေစေကြတဲ့
သေနတ်ဆိုးကို တွန်းလှန်ကြဖို့ထကြ ...ထကြ
သေစေကြတဲ့
သေနတ်ဆိုးကို အောင်နိုင်ဖို့ထကြ... ထကြ
သေနတ်ဆိုးကိုသေစေမဲ့ ရဲရင့်ခြင်းတွေ မွေးကြ... မွေးကြ
သေနတ်ဆိုးကိုသေစေမဲ့ အ,ကြောက်တရားတွေ ဟောကြ ... ဟောကြ
သေနတ်ဆိုးကိုသေစေမဲ့ သတိတရားတွေ မြဲကြ ... မြဲကြ
သေနတ်ဆိုးကိုသေစေမဲ့ ခန္ဓီတရားတွေ ထားကြ ... ထားကြ
သေနတ်ဆိုးကိုသေစေမဲ့ စာနာမှုတွေ များကြ ... များကြ
သေနတ်ဆိုးကိုသေစေမဲ့ မေတ္တာတရားတွေ ပွားကြ ... ပွားကြ
သေနတ်ဆိုးတွေ သေတဲ့တနေ့
သေခြင်းတရားက အမြဲလှပနေလိမ့်မယ်။
မရဏာသာ
(ကလောင်ရှင် မရဏာသာသည် ကဗျာများ မြောက်များစွာ ရေးသားနေသည့် ကလောင်ရှင်တဦးဖြစ်သည်)
