ယောဘဟာ သူ့ရဲ့ သားသမီးတွေကို ဘုရားသခင်နဲ့ မိတ်ဆက်ပေးသူ၊ ကောင်းမွန်စွာ သွန်သင်လမ်းပြသူတဦးလည်းဖြစ်ပါတယ်။ သူရဲ့သားသမီးတွေကို ဘုရားသခင်ကို မှားယွင်းမိမှာ၊ ပြစ်မှားမိမှာကိုလည်း စိုးရိမ်အားကြီးပြီး မပျက်တမ်း မီးရှို့ရာယဇ်ကို ပူဇော်လေ့ရှိတဲ့သူတယောက်လည်း ဖြစ်နေပါတယ်။
စည်းစိမ်ချမ်းသာပေါကြွယ်ဝသူ၊ သိုး နွား ကုလားအုပ်များစွာကိုလည်း ပိုင်သသူ၊ စသဖြင့် ချမ်းသာသူဖြစ်ချေတဲ့ယောဘဟာ သူ့သားသမီးများနဲ့ ပျော်ရွှင်စွာနဲ့ စည်ကားသိုက်မြိုက်နေထိုင်ရပြီး ပစ္စည်းဥစ္စာတွေလည်း ပေါကြွယ်လွန်းတာကြောင့် ပူပန်စရာမရှိလောက်အောင်ကို အဆင်ပြေနေတဲ့အချိန်မှာ ရှင်သန်နေရပေမဲ့လည်း မထင်မှတ်ထားတဲ့ ရှေဘအမျိုးသားတို့ရဲ့ဘေး၊ ကောင်းကင်ကကျတဲ့မီးဘေး၊ ခါလဒဲအမျိုးသားတပ်တို့ရဲ့ဘေး၊ တောကလာတဲ့လေဘေး၊ အနာစိမ်းပေါက်တဲ့ဘေးတွေကို ကြုံတွေ့ခံစားခဲ့ရပါတယ်။ ဒီလိုမျိုး မထင်မှတ်ထားတဲ့ ဘေးအမျိုးမျိုးကြောင့် သူရဲ့ဘဝက စုတ်ပျက်သက်သွားခဲ့ပြီး အရင်တုန်းကအခြေအနေနဲ့ လုံးဝဆန့်ကျင်ဘက်အခြေအနေကို ရောက်ရှိသွားခဲ့ပါတော့တယ်။ ချမ်းသာသူအဖြစ်ကနေ ဆင်းရဲမွဲတေသူ၊ ကျန်းမာသူအဖြစ်ကနေ နာကျဥ်ငိုကြွေးမြည်တမ်းနေရသူ၊ သားသမီးများနဲ့ ပျော်ရွှင်နေရာမှ သားသမီးများကို ဆုံးရှုံးရသူ၊ အစရှိတဲ့ မထင်မှတ်ထားတဲ့အရာတွေက သူ့ကို အားနဲချည်နဲ့အောင်တိုက်ခိုက်ခဲ့ပါလေတယ်။
ဒါပေသိ သူရဲ့ ထာဝရဘုရားအပေါ် ယုံကြည်ခြင်း၊ ကိုးစားခြင်းကတော့ အလျင်းမပျက်ခဲ့။ ခံစားရတဲ့အရာများအပေါ်မှာ သည်းခံတတ်ခြင်းကလည်း အတုယူစရာပင်။ ယောဘအပေါ်ကို သူ့မိတ်ဆွေများရဲ့ ဝေဖန်ခြင်း၊ စွပ်စွဲခြင်း၊ အပြစ်တင်ခြင်း၊ အထင်မှားခြင်း အမျိုးမျိုးကို ခံရပေမဲ့လည်း သူရဲ့ယုံကြည်ခြင်းက မပျက်ခဲ့ပါချေ။ သူ့အသက်တာကို သူကိုယ်တိုင်လည်း အမြဲတမ်း ပြန်လည်သုံးသပ်တတ်သူဆိုပြီး နားလည်ရပါတယ်။
ယောဘလိုပါပဲ ကျွန်ုပ်တို့ယုံကြည်သူများရဲ့အသက်တာမှာလည်း မထင်မှတ်ထားတတ်တဲ့အရာတွေဖြစ်လာတတ်ချေတယ်။ ဒီနေ့အဆင်ပြေနေပေမဲ့လည်း မနက်ဖြန်မှာ ပြောင်းပြန်အခြေအနေဖြစ်သွားခြင်း၊ လက်ရှိပျော်ပိုက်နေပေမဲ့လည်း ခနနေလျှင် ငိုကြွေးရခြင်း၊ စီးပွားရေး အခြေအနေကောင်းနေပေမဲ့လည်း ရုတ်တရက် ဘဝလှိုင်းဒဏ်ကြားမှာ အဆင်မပြေဖြစ်ရခြင်း၊ ကျန်းမာရေးကောင်းနေပေမဲ့လည်း မကျန်းမာခြင်းကို ခံစားရခြင်း အစရှိတဲ့ မထင်မှတ်တဲ့ ကိစ္စတွေကိုကြုံတွေ့ရတတ်ပါတယ်။
ဒါကြောင့် ယောဘရဲ့အသက်တာကို ဆင်ခြင်ကြည့်ခြင်းအားဖြင့် ကျွန်ုပ်တို့ယုံကြည်သူများဟာ မိမိတို့ရဲ့ နေ့စဥ်အသက်တာကို ပြန်လည်ဆင်ခြင် သုံးသပ်တတ်သောသူ၊ မထင်မှတ်ထားသော အရာများစွာကို ကြုံတွေ့ရင်ဆိုင်ရပေမဲ့လည်း သည်းခံတတ်သူ၊ ထာဝရဘုရားကို ယုံကြည်ကိုးစားခြင်း မပျက်သူ၊ ထာဝရဘုရားကို မပြစ်မှားသောသူဖြစ်ကြဖို့ရန်အတွက် အနည်းငယ်တိုက်တွန်း ခွန်အားပေးလိုက်ပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
