နံရံပေါ်ကနာရီသံမဟုတ်
စမ်းချောင်းစီးသံမဟုတ်
ဖြုတ်လိုက်တဲ့ မောင်း သံမဟုတ်
သဲ့သဲ့ကြားရတဲ့ ဒီနှလုံးခုန်သံက
တိတ်ဆိတ်ခြင်းကိုဖြိုတယ် . . .
ကြယ်ရောင် လရောင်မဟုတ်
လမ်းဘေးမီးရောင်မဟုတ်
ဖန်တီးလုပ်ယူထားတဲ့ အလင်းရောင်မဟုတ်
အဖြူ ရောင် ဒီနှလုံးသားက
အမှောင်ထုကိုဖြိုတယ် . . .
အာဏာ မဟုတ်
မာယာမဟုတ်
ဂုတ်သွေးစုပ်တဲ့ သားကောင်မဟုတ်
စာနာတတ်တဲ့ ဒီနှလုံးသားက
အမုန်းတရားကို ဖြိုတယ်. . .
ဒီ နှလုံးသား
ဒီ နှလုံးသားတွေက
ဒီကမ္ဘာမြေကို အရောင်ပြောင်းစေတယ်။
လိုင်ဂျီယာ (မိုးကုတ်)
(ကလောင်ရှင် လိုင်ဂျီယာ (မိုးကုတ်)သည် ကဗျာများ မြောက်များစွာ ရေးသားနေသည့် ကလောင်ရှင်တဦးဖြစ်သည်)
