စောဒကတက်ခြင်းဆိုသောအရာကို လူတိုင်းလုပ်ဖူးကြမည်ထင်ပါသည်။ "ငါ့ကို အထွန့်မတက်နဲ့"ဟုလည်းပြောဖူး ကြားဖူးကြဦးမည်။ အလုပ်တခုခုကိုဖြစ်စေ၊ အကြောင်းတခုခုကိုဖြစ်စေ လုပ်ဆောင်ရာတွင် တဦးတယောက်က ပြန်လည်၍ စောဒကတက်ခြင်းမျိုး၊ အထွန့်တက်ခြင်းမျိုးများကို ဆိုလိုခြင်းဖြစ်သည်။ ဥပမာ ... မိခင်လုပ်သူက ထမင်းအိုးတည်ခိုင်းရာတွင် သားသမီးဖြစ်သူက ထမင်းအိုးမတည်ချင်၍ စောဒတက်ခြင်း၊ သို့တည်းမဟုတ် ထမင်းအိုးသည် တည်ရန်အဆင်ပြေနေသော်လည်း မိခင်၏ထမင်းအိုးက သေးနေ၍ ပိုကြီးသော ထမင်းအိုးနှင့်သာ အဆင်ပြေမည်ဟူ၍ အထွန့်တက်ခြင်းမျိုးဖြစ်ပေသည်။
စာရေးသူတို့ ယုံကြည်သူများသည်လည်း အင်မတန် စောဒကတက်ကြသူများဖြစ်ကြသည်ကို မမေ့အပ်ပေ။ တခုခုဆိုလျှင် စောဒက,ကလေးတက်လိုက်ရမှ၊ တခုခုဆိုလျှင် အထွန့်ကလေးတော့ တက်လိုက်ရမှ နေသာထိုင်သာရှိတတ်ကြသူများဟု ယိုးမယ်ဖွဲ့ရပါဦးတော့မည် မဟုတ်လေလော။ အဆိုပါကိစ္စများအား ဆင်ခြင်ကြည့်ရှုရာတွင် အထွန့်တက်ခြင်း စောဒကတက်ခြင်းဆိုသောအရာသည် မိမိတို့၏ ဇာတိသဘောအလိုဆန္ဒကြောင့်သာ ဖြစ်သည်ဟု ဆိုရပေမည်။ မယုတ်တမ်းသာ အလိုတော်ဝန်ခံနိုင်ခြင်း ရှိလျှင်တော့ "ဒီလိုဆိုရင်ကောင်းမယ်တို့၊ ဟိုလိုမှဖြစ်မယ်တို့" စသဖြင့် အထွန့်အတက်၊ အကိုင်းအခက်တွေ စောဒကတွေ တက်နေကြမည်မဟုတ်ပေ။
တမန်တော်ဝတ္ထု အခန်းကြီး (၉)ကိုဖတ်ရှုကြည့်သောအခါတွင် ရှင်ပေါလု (ရှောလု)၏အဖြစ်ကို မြင်တွေ့ရပါမည်ဖြစ်သည်။ ၎င်းသည် ခရစ်ယာန်များကို နှိပ်စက်ညှင်းဆဲသောသူ၊ အကျဥ်းချဖမ်းဆီးတတ်သောသူ၊ အသက် အန္တရာယ်ကို ရန်ရှာခြိမ်းခြောက်တတ်သူ၊ ခရစ်ယာန်များကို သတ်ရသည်အထိ စိတ်ခွန်အားကြီးသူတယောက်ဖြစ်သည်။ ဒမာသတ်သွားရာလမ်းတွင် မမျှော်လင့်ထားသော အလင်းတန်းကိုမြင်ရှုရပြီးသည့်နောက်တွင် "ရှောလု ရှောလု အဘယ်ကြောင့်ငါ့ကို ညှဥ်းဆဲသနည်း"ဆိုသော အသံကိုကြားကာ မျက်စိမမြင်ရတော့ပေ။
အဆိုပါ အဖြစ်ကြောင့် ရှောလုပေါ်သို့ လက်တင်၍ ဆုတောင်းပေးရန် အာနနိသည် စေလွှတ်ခြင်းကိုခံရသည်။ အာနနိကလည်း "ကိုယ်တော် ဒီလူက ယေရုရှလင်မြို့က သန့်ရှင်းသူတွေကို ညှဥ်းဆဲတဲ့သူလို့ ကြားဖူးတယ်နော်၊ ကျွန်တော်တို့ခရစ်ယာန်တွေကို နှိပ်စက်တဲ့သူလေ၊ ခရစ်ယာန်တွေကိုဖမ်းတာလည်းသူပေါ့၊ သတ်ပစ်တာလည်းသူပဲ၊ ဒီကိုလာတာလည်း အကြံနဲ့လာတာ ဖမ်းဆီးဖို့ပဲလေကိုယ်တော်၊ ယဇ်ပရောဟိတ်ရဲ့ အခွင့်နဲ့တောင် လာတာဆိုတဲ့ စောဒကလေးကို မြင်ရပါတယ်"
သူ့နေရာတွင် ကြည့်လျှင်တော့ ဟုတ်နိုင်ပါသည်။ စိုးရိမ်ဖွယ်ရာကောင်းပါသည်။ ကြောက်စရာဖြစ်နေသည်။ မိမိအား ဒုက္ခပေးသောသူပဲ၊ ကန်းပါစေ၊ ကန်းလဲအေးရော၊ ကန်းရုံမျှသာမက နားပါမကြားရလျှင် ပို၍ပင်ကောင်ပေးသေးသည် မဟုတ်ပေလော။ သို့ရာတွင် အာနနိ၏ ဥာဏ်တထွာတမိုက်သည် ဘုရားသခင်၏ အကြံအစည်တော်အား မည်၍မည်ပုံ မှီနိင်ပါမည်နည်း။
အတုယူရန်မှာ ... အာနနိစိုးရိမ်သည်၊ ကြောက်ရွံ့မိနိုင်သည်၊ အဆိုပါလူကို မကောင်းသောသူဟု သိသည်။ သို့ရာတွင် အလိုတော်အတိုင်း ဆက်သွားသည်ကိုတော့ မြင်တွေ့ရလေသည်။ ထို့ကြောင့်လည်း ရှင်ပေါလုအားဘုရားသခင် မည်၍မည်ပုံ အသုံးပြုမည်ဆိုသည်ကို သူသိခဲ့ရသည်။ အမှန်တကယ်တွင်လည်း ရှင်ပေါလု၏ အသက်တာသည် လုံးဝခြားနာသွားသည်မှာ အားလုံးအသိပင် မဟုတ်ပါလော။
သခင်ဘုရားကလည်း၊ ထိုသူကားတပါး အမျိုးသားတို့နှင့် ရှင်ဘုရင်တို့ထံသို့၎င်း၊ ဣသရေလ အမျိုးသားတို့ရှိရာသို့၎င်း၊ ငါ၏နာမကို ပို့ဆောင်စေခြင်းငှါ ငါရွေးကောက်သော တန်ဆာဖြစ်၏။
(တမန်တော်ဝထ္ထု ၉:၁၅)
ဆက်လက်၍ တမန်တော်ဝတ္ထု အခန်းကြီး (၁၆)ကို ဖတ်ရှုရလျှင် ဝိညာဥ်တော်မြစ်တားခြင်းကို တွေ့မြင်ရပါသည်။ အာရှရိပြည်တွင် နှုတ်ကပတ်တော်ဝေငှရန်နှင့် ဧဝံဂေလိဟောကြားရန် မြစ်တားခြင်းခံရပါသည်။ ပြောမယ်ဆိုလျှင် ဧဝံဂေလိတရားဟောကြားခြင်းသည် အင်မတန်မွန်မြတ်သောအရာဖြစ်သော်လည်း ဘုရားသခင်ပြင်ဆင်သော အခြားအချင်းအရာများလည်း ရှိသေးသည်ကြောင့် ထိုအချိန်အား တားမြစ်၍ တပါးအခြားတိုင်းပြည်သို့ သွားစေရန် ဖြစ်စေခဲ့သည်။ လူ့အနေနှင့်ကြည့်လျှင် "ဧဝံဂေလိတရားကို မြစ်တားတယ် ရှင်ပေါလုကို မသွားဖို့တားမြစ်တယ် ဒါ့ကြောင့် ဒီအရပ်က အမှောင်လောကသားတွေ၊ မိစ္ဆာကောင်တွေ၊ လူမိုက်တွေ၊ ပညာမဲ့တွေ၊ ဘုရားသခင်၏ ကျေးဇူးတော်မရှိတဲ့အရပ်၊ ရှင်ပေါလုကို မြစ်တားလို့ ဒီအရပ်မှာ ကျေးဇူးတော်ကာလကုန်ပြီ"ဟု လူ့သဘောနှင့် ပေါက်ကရမှတ်ထင်နိုင်သော်လည်း ရှင်ပေါလုသည် မထင်မှတ်ခဲ့သလို အခြားသူများလည်း မထင်ခဲ့ကြပါချေ။
ဖြူဂိပြည်၊ ဂလာတိပြည်ကို ရှောက်သွားပြီးမှ အာရှိပြည်၌ နှုတ်ကပတ်တရားတော်ကို မဟောစေခြင်းငှါ သန့်ရှင်းသော ဝိညာဉ်တော်သည်မြစ်တားတော်မူသဖြင့်၊
(တမန်တော်ဝထ္ထု ၁၆:၆)
မုသိပြည်သို့ရောက်ရှိသော်လည်း ဗိသုန်ပြည်သို့သွားခြင်းငှာ အခွင့်မပေးခဲ့ပြန်။ ဤသို့နှင့် တရောမြို့သို့ရောက်သောအခါတွင်တော့ မာကေဒေါနိပြည်သို့သွား၍ ထိုသူများအား မစစေရန် ဗျာဒိတ်တော်ကိုရခဲ့သည်မဟုတ်ပါလား။ အဆိုပါအရာများအား ကြည့်ရှုဆင်ခြင်ရမည်ဆိုလျှင် ဘုရားသခင် မြစ်တားသောအရာများတွင်ဘုရားသခင်၏ အကြံအစည်တော်ရှိသည်။ ဧဝံဂေလိတရားအား အာရှိပြည်တွင် ဟောကြားသည်မှာ "မကောင်းဘူးလားဟု မေးလျှင် ကောင်းတယ်ဟု ဖြေကြမှာပါ" သို့ရာတွင် လျှာမရှည်ရန်နှင့် အလိုတော်က မာကေဒေါနိသို့သွားဟု ပြောလျှင် သွားရမည်မှာ ရှင်ပေါလု၏အလုပ်ပင်။ တခါတခါတွင် ကျွန်ုပ်တို့ ခရစ်ယာန်များက လျှာရှည် အာချောင်တတ်ကြသည်မဟုတ်ပါလား။
ထိုဗျာဒိတ်ရူပါရုံကို မြင်ရလျှင်၊ မာကေဒေါနိ ပြည်၌ ဧဝံဂေလိတရားကို ဟောစေခြင်းငှါ သခင်ဘုရားသည် ငါတို့ကို ခေါ်တော်မူသည်ဟု ငါတို့သဘောကျသဖြင့်၊ ထိုပြည်သို့သွားခြင်းငှာ ချက်ခြင်း ရှာကြံကြ၏။
(တမန်တော်ဝထ္ထု ၁၆:၁၀)
ကျွန်ုပ်တို့ယုံကြည်သူများသည် အင်မတန်လျှာရှည်တတ်သော မျိုးနွယ်များဖြစ်သည်ဟု ထပ်လောင်းဆိုချင်ပါသေးသည်။ ဘုရားသခင်ပေးသည်ကို မလိုချင်၊ ထားရာတွင် မနေချင်၊ စေခိုင်းသည်ကို မလုပ်ချင်၊ ပြောသည်ကို နားမထောင်ချင်သော အဖြစ်များလည်း ဖြစ်နေကြမှန်းမသိ ဖြစ်နေတတ်ကြပါသည်။ မိမိတို့၏ ဇာတိသဘော၊ မိမိတို့၏ပညာဥာဏ်မျက်စိ တထွာတမိုက်လောက်ဖြင့် မိမိကောင်းသည်ထင်ရာကိုသာ ဇွတ်အတင်း တောင်းဆိုတတ်ကြသည်။ ကောင်းသည်ဟုထင်ရာသာ ဇွတ်လုပ်တတ်ကြသည်။ ဘုရားသခင်ထက်သာ၍ သိကြတတ်ကြသယောင်ယောင်လည်း လုပ်မိကြသေးသည်။ အလိုတော်က ဘာမှန်းမသိကြကာ မိမိတို့၏ ဇာတိပကတိ သဘောတွင်သာ ကောင်းမည်ဟုထင်ရာကိုသာ စောဒကတတ်ကြသူများ ဖြစ်နေတတ်ကြသည်။ ဘုရားသခင်က အဖြေတခုပေးထားလျှင် လက်မခံနိုင်၊ ဝန်မခံနိုင်ကြပေ။ "ဒါလေးက ဘယ်လို၊ ဒါလေးကတော့ ဒီလိုမှကောင်းတာပေါ့၊ ဒါကြီးဆို ဘယ်ကောင်းမလဲ" စသဖြင့် စောဒကလေးများ အထွန့်ကလေးများတက်ရင်း တမန်တော်ကြီး ရှင်ပေါလုအား မျက်စိကန်းစေချင်သူနှင့် အာရှိပြည်၌သာ နှုတ်ကပတ်တရားဟောကြားချင်နေကြသူများ ဖြစ်နေသည်လားဆိုသည်ကို ဆင်ခြင်ကြည့်ရန်လိုအပ်ပါသည်။
သို့ပါသောကြောင့် ယုံကြည်သူတိုင်းသည် ဘုရားသခင်၏ အလိုတော်ကို ဝန်ခံနိုင်ရန်လိုအပ်ပါသည်။ မိမိ၏ ပုဂ္ဂလအမြင်တွင် ကောင်းမည်ဟု မှတ်ထင်ရနိုင်ချေရှိသော်လည်း အဆိုပါအရာအား သန့်ရှင်းသောဝိညာဥ်တော်က မြစ်တားခြင်းဖြစ်သောအခါတွင် ဝန်ခံနိုင်ခြင်း လက်ခံနိုင်ခြင်းရှိတတ်ရမည်ဖြစ်သည်။ တခါတရံ မိမိအမြင် တွင် လူတယောက်သည် "မကောင်းဘူး၊ ခရစ်ယာန်များကို ထိခိုက်စေသူ"ဟု ထင်ရနိုင်ချေရှိသော်လည်း ဘုရားသခင်၏ ဆုတောင်းပေးပါဟုဆိုသော အရာပေါ်တွင် နာခံသူဖြစ်ရပါမည်။ အသင်းတော်အား ညှဥ်းဆဲသူ၊ ခရစ်ယာန်များအား ဖမ်းဆီးသူဟု ထင်ရသောသူကို ဘုရားသခင်ရွေးကောက်သောအခါတွင်လည်း အလိုတော်ကို ဝန်ခံနိုင်သောသူ ဖြစ်ရပါမည်။ အဘယ့်ကြောင့်ဆိုသော် ယုံကြည်သူတို့၏ဥာဏ်မျက်စိ တထွာတမိုက်လောက်ဖြင့် ဘုရားသခင်၏ အကြံအစည်တော်ကို သူ့ထက်သာ၍ သိသယောင်ယောင် မဖြစ်စေဖို့ရန်မှာ အင်မတန် အရေးကြီးသောကြောင့်ပင် ဖြစ်သည်။
ထို့ကြောင့် ယုံကြည်သူများသည် ဘုရားသခင်၏ အလိုတော်ကို ဝန်ခံနိုင်သောသူ ဖြစ်ကြရမည်ဖြစ်ပြီး အထွန့်၊ စောဒက မတတ်ကြသောသူများ ဖြစ်နိုင်ကြပါစေဟု တိုက်တွန်းခွန်အားပေးရင်း အနည်းငယ် ဝေမျှလိုက်ရပါသည်။
ဘုရားရှင်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
