နာကျင်ရခြင်းသည် လူတယောက်၏ စိတ်ပိုင်းဆိုင်ရာကိုပါ ထိခိုက်သည်။
တနည်းအားဖြင့်ပြောရလျှင် လက်ရှိကြုံတွေ့နေရသော အဆင်မပြေခြင်း၊
စိတ်ပျက်အားငယ်ခြင်း၊ စိတ်ဓါတ်ကျဝမ်းနည်းခြင်း၊ ခြေကုန်လက်ပန်းကျခြင်း၊
ငိုကြွေးမြည်တမ်းရခြင်း၊ စသည်ဖြင့် အတိုင်းအတာတခု အရောက်တွင် စိတ်ပိုင်းဆိုင်ရာ
ထိခိုက်နာကျင်လာစေခြင်းဖြစ်သည်။
အဆိုပါကိစ္စမျိုး
ခံစားနေရသော လူတယောက်သည် အကြောင်းကိစ္စအားလုံးကို တဖြည်းဖြည်းနှင့်
စိတ်ပျက်လာရင်း အားငယ်လာရင်းနှင့် စိတ်ဓာတ်ကျလာမည် ဖြစ်သည်။ ဤသို့ဖြင့် အဆုံးတွင်
အသက်ရှင်ချင်စိတ် ပျောက်ဆုံးလာကာ စိတ်ပျက်ရင်းဖြင့် လောကကြီးကို စွန့်ခွာရန်
ဖြစ်လာပါလိမ့်မည်။
အဆိုပါပြဿနာ၏
အရင်းအမြစ်ကို ရှာဖွေကြည့်မိသောအခါတွင်လည်း အဆင်မပြေခြင်း၊ မတရားသဖြင့်ခံရခြင်း၊
ငြင်းပယ်ခံရခြင်း၊ သစ္စာဖောက်ခံရခြင်း စသည့် အကြောင်းတရားများကြောင့်ဟု
အခြေခံအားဖြင့် နားလည်နိုင်ပါသည်။
ဟုတ်ပါသည်။ သည်လို ခံစားရသည့် ခံစားချက်တွေတိုင်းသည် အင်မတန်နာကျင်စရာ ကောင်းလှပါသည်။ သို့ပေသိ ဒဏ်ရာဗလပွနဲ့ဆိုတိုင်း မျှော်လင့်ချက်မရှိနိုင်တော့ သည်တော့ မဟုတ်ပါ မိတ်ဆွေ...။
မိတ်ဆွေ၏ ကြုံတွေ့ခံစားနေရသော
ရုပ်ပိုင်းဆိုင်ရာ နာကျင်ရခြင်းများ၊ စိတ်ပိုင်းဆိုင်ရာ ခါးသီးမှုများအား ယေရှုခရစ်တော်ဆိုသည့်
ပုဂ္ဂိုလ်သည်လည်း ထပ်တူထပ်မျှခံစားခဲ့ရပါသည်။ မတရားသဖြင့်ခံရခြင်း၊ အပြစ်မရှိသည်ကို
အပြစ်ရှိသည်ဟု ရိုးစွပ်ခြင်း၊ အရှက်ခွဲခံရခြင်း၊ နှိပ်စက်ခံရခြင်း၊
လှောင်ပြောင်ခံရခြင်း၊ ငြင်းပယ်ခံရခြင်း၊ သစ္စာဖောက်ခံရခြင်း၊ စသဖြင့်
ခံစားခဲ့ရဖူးသည်။ ထိုအတွက်ကြောင့် မိတ်ဆွေ ကြုံတွေခံစားနေရသည်ကို
ယေရှုခရစ်တော်သည် ထပ်တူနားလည်ပါသည်။
ရှင်မဿဲခရစ်ဝင် ၁၁:၂၉-၃၀
ငါ့ထမ်းဘိုးကို တင်၍
ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့နှိမ့်ချသော စိတ် သဘောရှိ၏။
သင်တို့စိတ်နှလုံးသည် သက်သာခြင်းကိုရလိမ့်မည်။ အကြောင်းမူကား၊ ငါ့ထမ်းဘိုးသည်
ထမ်းလွယ်၏။ ငါ့ဝန်လည်းပေါ့၏ဟု မိန့်တော်မူ၏။
ရှေးဦးစွာ မိတ်ဆွေ နာကျင်ခံစားနေရသော လေးသော ဝန်ကို ချနိုင်ဖို့ရာ ယေရှုခရစ်တော်ထံ အရင်ဦးစွာ တိုးဝင်ပါ။
ငါ့ထံသို့လာကြ၊ ငါသည်ချမ်းသာပေးမည်ဟု ဆိုသည့်အတိုင်း မိတ်ဆွေအတွက် ငြိမ်ဝပ်ခြင်းချမ်းသာကို ရအောင်ယူပါ။
သင်၏ဝန်ထုတ်များကို
မနိုင်ဝန်ထမ်းနေမည့်အစား သခင်ခရစ်တော်တင်သော ထမ်းဘိုးပေါ်သို့တင်ပါ၊ ထိုထမ်းဘိုးသည်
ထမ်းလွယ်သည်၊ သခင်တင်သောဝန်သည် ပေါ့သည်ဟုဆိုသည့်အတိုင်း သင်မနိုင်သောဝန်ကို သခင်ထံ မတင်ပါ။
သခင်ပေးသော ဝန်ကိုသာ
ထမ်း၍ ဘဝသစ်ကို ထမ်းဘိုးအသစ်နှင့် ဝမ်းမြောက်စွာ လျှောက်လှမ်းနိုင်ဖို့
သခင်အလိုရှိသည်။
သင်နာကျင်ခံစားခဲ့ရသမျှကို သခင်သည် နားလည်သည်၊ သိမှတ်သည်။ ဒါ့ကြောင့်လည်း
သင့်ကိုအလျှင်းပစ်၍မထားဘူးဟုလည်း ကတိတော်ရှိထားသည်။
သင်ရော ထိုသခင်ထံ တိုးဝင်ဖို့ အဆင်သင့်ဖြစ်ပြီလား၊ ထိုကတိတော်ကို
လက်ခံဖို့ ပြင်ဆင်ပြီးပြီလား။
"မိတ်ဆွေ အဆင်သင့်ဖြစ်ပြီဆိုရင်တော့ သခင်ပြင်ဆင်တဲ့ ဘဝသစ်ကို
ထမ်းဘိုးအသစ်နှင့် လဲလှယ်လိုက်ပါတော့လား"ဟု အနည်းငယ် ခွန်အားပေးတိုက်တွန်းချင်ပါသည်။
ဘုရားရှင်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
