ဘုရားသခင်သည် လူသားများ ကယ်တင်ခြင်းရဖို့ရန် လူသားများ၏ လုပ်ဆောင်ချက်တခုခုကို လိုအပ်နေပါသေးသလား။ လူတစ်ယောက်သည် ကယ်တင်ခြင်းကို လက်ခံရယူဖို့ရန် သူ၏အပြုအမူ၊ အနေအထိုင်၊ အကျင့်၊ ကောင်းမှုတွေ၊ ဥပုဒ်တွေ စသဖြင့်ကို ဘုရားသခင်သည် တောင်းဆိုပါသလား။
တောင်းဆိုခဲ့ပါမူ ယေရှုခရစ်တော်၏ ကယ်တင်ခြင်းအစီအစဥ်သည် မလုံလောက်၍လော။ အကယ်၍သာ မိမိတို့၏ အကျင့်တရားနှင့် ကျင့်နိုင်ပါလျှင်မူ သခင်ယေရှု ကိုယ်တောင်တိုင် ဆင်းကယ်ဖို့ရန် မလိုအပ်ပေတော့ဘူး မဟုတ်လော။
ဂလာတိအသင်းတော်အား ရှင်ပေါလုသည် ထိုအမှုအရေးအတွက် အရေးတကြီး စာရေးသည်။ အဘယ့်ကြောင့်ဆိုသော် ဂလာတိလူတို့အား မှားယွင်းစွာ သွန်သင်နေသော ဆရာများနှင့် ထိုသူတို့ဟောပြောသော အခြားသော ဧဝံဂေလိတရားကြောင့်ဟု ဆိုကြပါစို့။
ဂလာတိဩဝါဒစာ ၁:၆-၇
ခရစ်တော်၏ ကျေးဇူးအားဖြင့် သင်တို့ကို ခေါ်တော်မူသောသူနှင့် ဤမျှလောက်မြန်မြန်ခွာ၍ သင်တို့သည်အခြားသော ဧဝံဂေလိတရားကို ခံယူကြရသောကြောင့် ငါသည်အံ့ဩခြင်းရှိ၏။ ထိုဧဝံဂေလိတရားသည် ဧဝံဂေလိတရားမဟုတ်။ သင်တို့ကို နှောက်ယှက်၍ ခရစ်တော်၏ ဧဝံ ဂေလိတရားကို မှောက်လှန်ချင်သောသူ အချို့ရှိကြ၏။
ဂလာတိလူတွေသည် အမှန်တကယ်တွင် ဧဝံဂေလိသတင်းစကားကို ကြားပြီးသား၊ ပြောင်းလဲပြီးသားသူတွေဖြစ်ကြသည်။ ရှင်ပေါလု မရှိတော့သည့်အချိန်အခါတွင် သို့သော အခြင်းအရာဖြစ်လာ၍ သတိပေးစာပြင်းပြင်းထန်ထန်ရေးသား၍ ပေးလိုက်ရခြင်းဖြစ်သည်။
အဆိုပါအပိုင်းလေးအား အတိုချုပ်၍ ကြည့်ရအောင်။
"ဒီလူတွေက ဘုရားသခင်ရဲ့ကျေးဇူးတော်ကနေ မြန်မြန်ခွာသွားကြတယ်" တနည်းအားဖြင့် ဂရိစကားလုံး (metatithemi) "လူတဦးမှတဦးသို့ပြောင်း၍ သစ္စာခံခြင်း"ဟု အဓိပ္ပါယ်ဖွင့်ဆိုရပါမည်။ နိုင်ငံရေး၊ အတွေးအခေါ်ပိုင်း စသဖြင့် အခြားဘက်ကို ပြောင်းသွားသည်ဆိုသောသဘောဟု နားလည်ရပါသည်။ အဆိုပါ ဘက်ပြောင်းသွားသူများ၊ တပ်ပြေးများ စသူတို့အား ပုံပမာ သဘောမျိုးနဲ့ ရှင်ပေါလုက ဂလာတိလူများအား ဝိညာဥ်ရေးရာ တပ်ပြေးများဟု ပြောနေခြင်းသဏ္ဍာန်မျိူး ဖြစ်နေပါသည်။
မည်သည်အတွက်ကြောင့် အဆိုပါသူတို့သည် ပြောင်းလဲသွားရခြင်းဟု လေ့လာကြည့်ရှုမိသောအချိန်တွင် "ဧဝံဂေလိတရားဟာ မလုံလောက်ဘူး။ အကျင့်ပါရမယ်။ အရေဖျားလှီးရမယ်" စသဖြင့်ပြောသော ယုဒဘာသာရေးဆရာသမားတွေကြောင့်ဖြစ်သည်ဆိုသည်ကိုတွေ့ရှိရပါသည်။ တနည်းအားဖြင့်ဆိုရလျှင် "ခရစ်တော်ပြုပေးသော ကယ်တင်ခြင်းဟာ မလုံလောက်ဘူး။ ကျေးဇူးတော်မလုံလောက်ဘူး။ လူကလုပ်ရဦးမယ်"ဟု ဆိုလိုခြင်းဖြစ်သောကြောင့်ပင်။
ထိုအရာများကြောင့် ဂလာတိလူတွေသည် အခြားသောဧဝံဂေလိတရားကို လိုက်သွားရခြင်းဖြစ်သည်ဟု သိရသောအချိန်တွင် ရှင်ပေါလုသည် အင်မတန် စိတ်ထိခိုက်ရပါသည်။ အကြောင်းမှာ ၎င်းကိုယ်တိုင်သည် ဖာရိရှဲခဲ့ဖူးသည်။ အကျင့်ပိုင်းသော်လည်းကောင်း ဥပုဒ်ပိုင်းတွင်သော်လည်းကောင်း တခုမှလွတ်စေရ။ ငါနှင့်ရွယ်တူထဲတွင် "မင်းကြိုက်သလိုရှာ မင်းကြိုက်တာနဲ့ တိုင်းနိုင်တယ်"ဟု ဆိုဝံ့သူဖြစ်သည်။ သူသည် အဆိုပါအခြေအနေ ရပ်ရပ်မှတဆင့် ပြောင်းလဲလာသူဖြစ်ခြင်းကြောင့် ပို၍ပင် ထိခိုက်နာကျင်ရသည်ဟု နားလည်ရပါသည်။
ရှင်ပေါလုပို၍ နာကျင်ရသောအချက်မှာ ထိုသွန်သင်ချက်တွေသည် ဧဝံဂေလိတရားကို လျော့ပါးစေခြင်း၊ ယေရှုခရစ်တော်၏ ကျေးဇူးတရားကို မလုံလောက်စေခြင်း၊ ကျေးဇူးတော်နောက်မှ ပြန်လည်ကာ လမ်းလွဲသွားစေခြင်း၊ ဖောက်လွဲဖောက်ပြန်ဖြစ်စေခြင်းများသည် စစ်မှန်သော ဧဝံဂေလိတရားကို စော်ကားရာရောက်သောကြောင့် ပြင်းပြင်းထန်ထန် ရေးသားခြင်းများကို ကိုယ်တွေ့ မျက်မြင် သိရှိရခြင်းကြောင့်ဖြစ်သည်။
အချုပ်အားဖြင့်ဆိုရသော် ဧဝံဂေလိတရားစစ်စစ်သည် (ဧဖက် ၂:၈-၉) အရ ဘုရားသခင် သနားတော်မူသောကြောင့်ဖြစ်သည်။ ယုံကြည်ခြင်းကြောင့်ဖြစ်သည်။ ကျေးဇူးတော်ကြောင့်ဖြစ်သည်။ တနည်းအားဖြင့် ယေရှုခရစ်တော်၏ ကားတိုင်တော်တရားကြောင့်ဖြစ်သည်။ လူ၏ အကျင့်သိက္ခာ တခုမျှ မလိုအပ်ပေ။ အဆိုပါအရာအား ယုံကြည်လက်ခံရန်သာ လိုအပ်ခြင်းဖြစ်သည်။ ထိုအတွက်ကြောင့် မည်သူမျှ ဝါကြွားစရာမလိုအပ်ဟု သမ္မာကျမ်းစာတွင် တိတိပပ ဖော်ပြထားရခြင်ဖြစ်သည်ဟု နားလည်ရပါသည်။ အဆိုပါတရားအား လုံလောက်မှုမရှိဘူးဟုဆိုကာ ထပ်မံဖြည့်စွက်နေရလျှင်တော့ အခြားသော ဧဝံဂေလိဖြစ်တော့ပေမည်။ အင်မတန် အန္တရာယ်များသော တဆေးရောသော ဧဝံဂေလိဖြစ်ပေတေ့ာ့မည်။ ဤနေရာတွင် ကယ်တင်ခြင်းကိုသာ ဆိုလိုနေခြင်းဖြစ်သည်။ ခရစ်ယာန်အသက်တာပိုင်းအား ဆိုလိုခြင်း မဟုတ်ပါ။
မိမိ၏လုပ်ဆောင်ချက်တချို့ပါလျှင်တော့ ထိုသူတွေသည် ငကြွားများသာ ဖြစ်ချေရော့မည်။ ပုံပမာအားဖြင့် "ငါက ဘာလုပ်တာ၊ ငါကဘယ်လို၊ ငါကတော့ ဥပုဒ် ၂ရက်၊ ငါက ၅ရက် စသဖြင့် ငကြွားကြီးများ ကောင်းကင်တက်ခြင်း"ဟုဆိုထားသော ရုပ်ရှင်တကားမျှ ရိုက်နိုင်မည်မဟုတ်ပါလော။
အမှန်တကယ် ကယ်တင်ခြင်းစစ်စစ် ဧဝံဂေလိတရားစစ်စစ် ဆိုသည်မှာ ယေရှုခရစ်တော်ပြုခဲ့ပေးသော ကျေးဇူးတော်ကိုသာ ယုံကြည်လက်ခံခြင်းဖြစ်ပါသည်ဟု အနည်းငယ် ဝေမျှပေးလိုက်ပါတယ်။
ဘုရားရှက်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
