ဣသရေလလူမျိုးတွေကို အဲဂုတ္တုပြည်မှ ကယ်ထုတ်ဖို့၊ ခါနန်ပြည်ကိုသွားဖို့၊ စေခိုင်းခြင်းခံရတာဟာ မောရှေဖြစ်တယ်။ တောလမ်း ခရီးတလျှောက်လုံး အပင်ပန်းခံ ပြုစုလာခဲ့ရတယ်။ ညည်းတွားခြင်းတွေကို သည်းခံကာ ဦးဆောင်ခဲ့ရတယ်။ ဂျစ်ကန်ကန်စရိုက်တွေကို ထိန်းကျောင်းလာခဲ့တာ မောရှေဖြစ်ပါတယ်။ ဒီရူပါရုံသည် မောရှေကနေ အစပြုခဲ့ခြင်းဖြစ်ပါတယ်။
ဒါပေမဲ့ သူဟာ အဲဒီပြည်ကို မဝင်စားခဲ့ရချေ။ မောရှေဟာ သူလုပ်ဆောင်ရမဲ့ အရာမှန်သမျှကို သေသေချာချာလုပ်ဆောင်ခဲ့တယ်။ သစ္စာရှိစွာ ဆပ်ကပ်ခဲ့တယ်။ စနစ်တကျ ဦးဆောင်ခြင်းကိုပြုကာ စီမံခန့်ခွဲခဲ့တာကို မြင်တွေ့ခဲ့ရမှာဖြစ်ပါတယ်။ သူဦးဆောင်ပြီး ခေါ်လာခဲ့တဲ့ ရူပါရုံကိုတော့ သူမရောက်ရှိခဲ့။ သူမြင်တော့ မြင်ခဲ့ရတယ်။
တရားဟောရာကျမ်း ၃၄:၄
ထာဝရဘုရားကလည်း၊ ငါသည် အာဗြဟံ၊ ဣဇာက်၊ ယာကုပ်တို့အားကျိန်ဆို၍ သင်၏အမျိုးအနွယ်အား ငါပေးမည်ဟု ကတိထားသောပြည်ကို ကြည့်လော့။ သင်သည် ကိုယ်မျက်စိနှင့်မြင်ရသောအခွင့်ကို ငါပေး၏။ သို့ရာတွင် ကူး၍မသွားရဟု မိန့်တော်မူ၏။
ဒီလိုအဖြစ်မျိုး ကျွန်တော်တို့တွေလည်း ဖြစ်တတ်ကြတယ်။ ဥပမာဆိုရရင် အသင်းတော်ရဲ့ရူပါရုံတခု၊ မိသားစုရဲ့ရူပါရုံ၊ အသင်းတော်ရဲ့ သာသနာတခုရဲ့ရူပါရုံ၊ စသဖြင့်တွေမှာ ကြုံတွေ့ရတတ်ပါတယ်။ ဆိုကြပါစို့ ... အသင်းတော် ရူပါရုံတခုကို လုပ်နေရင်းနဲ့ ခေါ်တော်မူခြင်းခံရမယ်ဆိုရင် ဒီရူပါရုံကို ဆက်လက်လုပ်ဆောင်သွားဖို့ လူလိုမယ် မဟုတ်ပေဘူးလား။ ဒါ့ကြောင့် ဒီလိုအချိန်မှာ ရူပါရုံကို ဆက်လက် သယ်ဆောင်သွားဖို့ ဆက်လက်ပြုစုဖို့ ဆက်လက်ဦးဆောင်သွားဖို့ ဝိညာဥ်ရေးရာခေါင်းဆောင်ကောင်း တယောက်လိုပါတယ်။ သို့မှသာ အဲဒီရူပါရုံကို ပြည့်စုံစေနိုင်မှာဖြစ်ပါတယ်။ ဝိညာဥ်ရေးရာ ခေါင်းဆောင်ဟုဆိုခြင်းက အမှန်တကယ်ကို အရေးကြီးတာကြောင့်ပင်ဖြစ်တယ်။ အဲဒီနေရာကို တွေ့ကရာလူတွေ၊ ကြုံရာလူတွေက နေရာယူပြီး လုပ်ဆောင်နိုင်စွမ်းမရှိသောကြောင့်ပင်။
ယောရှုမှတ်စာ ၁:၁-၂
ထာဝရဘုရား၏ကျွန် မောရှေသည် အနိစ္စရောက်သောနောက်၊ မောရှေလက်ထောက်၊ နုန်၏သားယောရှုအား ထာဝရဘုရားက၊ ငါ၏ကျွန်မောရှေသည် အနိစ္စရောက်လေပြီ။ သို့ဖြစ်၍၊ သင်နှင့် သင်၌ပါသော ဤလူအပေါင်းတို့သည် ယခုထ၍ ယော်ဒန်မြစ်တစ်ဖက်သို့ ကူးကြလော့။ ဣသရေလအမျိုးသားတို့အား ငါပေးသောပြည်ကို ဝင်စားကြလော့။
အကယ်၍သာ ဦးဆောင်ပေးမယ့်သူမရှိရင် အဲဒီရူပါရုံဆီကို မရောက်နိုင်ခြင်းလည်း ဖြစ်နိုင်သလို၊ နှောင့်နှေးလွန်းတာလည်း ဖြစ်နိုင်မယ်။ လုံးဝပျက်စီးသွားတာလည်း ဖြစ်နိုင်ပါတယ်။ ဒါ့ကြောင့် ကျွန်တော်တို့တွေဟာ ယောရှုကဲ့သို့သော ခေါင်းဆောင် လိုအပ်ပါတယ်။ မောရှေရဲ့ရူပါရုံကို ဆက်လက်သယ်ဆောင်သွားသူ၊ ဆက်လက်ဦးဆောင်သူ ယောရှုဟာ ခေါင်းဆောင်ကောင်းတဦးဖြစ်ပါပေတယ်။
ကျွန်တော်တို့ အသင်းတော်တွေကလည်း ဝိညာဥ်ရေးရာ ခေါင်းဆောင်တွေကို မွေးထုတ်ဖို့ရန် လိုအပ်တယ်ဆိုတာကို အပေါ်ကအချက်တွေကို ကြည့်ခြင်းအားဖြင့် သိနိုင်ပါတယ်။ မိမိတို့တွေရဲ့ရူပါရုံတွေကို လက်ဆင့်ကမ်းဖို့ တကယ်ပဲ ဘုရားကိုချစ်ပြီး အမှုတော်မြတ်မှာ ပါဝင်တတ်တဲ့ ခေါင်းဆောင်ကောင်းတွေကို သမ္မာတရားနဲ့အညီ မွေးထုတ်ဖို့ရန် အင်မတန် လိုအပ်လှပါတယ်။ ကျွန်တော်တို့ရဲ့ အသင်းတော်ရူပါရုံတွေ၊ သာသနာရူပါရုံတွေ၊ အစရှိသဖြင့်ကို ဆက်လက် သယ်ဆောင်သွားပြီး ရူပါရုံကိုပြည့်စုံစေကာ နောက်ထပ် အသစ်အသစ်သော ရူပါရုံတွေကိုလည်း ဆက်လက်လုပ်ဆောင်ကာ တဆင့်ပြီးတဆင့် လက်ဆင့်ကမ်းပေးနိုင်တဲ့ ဝိညာဥ်ရေးရာခေါင်းဆောင်ကောင်းတွေကို မွေးထုတ်နိုင်ဖို့ရာလည်း တာဝန်ရှိတယ်ဆိုတာကို အနည်းငယ်ဝေမျှ တိုက်တွန်းခွန်အားချင်ပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
