ဘဝမှာ လူတိုင်းလူတိုင်းရဲ့ မကြားချင်ဆုံးဟာ နိုး(No)ဆိုတဲ့ စကားလုံးဖြစ်နိုင်ပါတယ်။ နိုးရဲ့ အဓိကရည်ရွယ်ချက်က ငြင်းပယ်ခြင်းဖြစ်နေတတ်တာကြောင့် မနှစ်မြို့တတ်ကြပေ။
လူတိုင်းလူတိုင်းရဲ့ ဘဝမှာ အနည်းဆုံးတကြိမ်တော့ ငြင်းပယ်ခြင်းကို ခံစားခဲ့ဖူးကြမယ်လို့ထင်တယ်။
- မိသားစုရဲ့ ငြင်းပယ်ခြင်း
- ချစ်ရသူရဲ့ ငြင်းပယ်ခြင်း
- ကျန်းမာရေးရဲ့ ငြင်းပယ်ခြင်း
- စီးပွားရေးရဲ့ ငြင်းပယ်ခြင်း
- ပညာရေးရဲ့ ငြင်းပယ်ခြင်း အစရှိတာတွေ ခံစားရတဲ့အခါမှာ စိတ်ပျက်အားငယ်စွာဖြစ်ကြတတ်ပါတယ်။ ဒီလိုနဲ့ အဲဒီငြင်းပယ်ခြင်းတွေကို ခံစားရပြီးတဲ့နောက်မှာ တစ်ခါတလေ ရှင်သန်ဖို့တောင် အားအင်ဆိုတာ မရှိတော့တဲ့အထိ စိတ်ဓါတ်ကျသွားတဲ့သူတွေ ဒုနဲ့ဒေးပါ။ ဒီလိုခံစားချက်တွေကို ရင်ဝယ်ပိုက်လို့ စိတ်ကျရောဂါ၊ စိတ်ကျရောဂါ၏ နောက်ဆက်တွဲဝေဒနာတွေဖြစ်တဲ့ မိမိကိုကိုယ် ထိခိုက်နာကျဥ်စေခြင်း၊ မိမိကိုကိုယ် အဆုံးစီရင်ခြင်းအထိ ဖြစ်ပွားစေတတ်ပါတော့တယ်။
ငြင်းပယ်ခြင်းဆိုတာဟာ လူတိုင်းမလိုချင်တဲ့ အရာတခု ဆိုပေမဲ့ ဒီငြင်းပယ်ခြင်းရဲ့နောက်ကွယ်မှာ မမြင်နိုင်တဲ့ မထင်မှတ်ထားတဲ့ အရာတခုရှိတယ် ဆိုတာကို အနည်းငယ် ပြောပြချင်ပါတယ်။
ဒါနဲ့ မိတ်ဆွေနဲ့ကျွန်တော်ရော အဲဒီငြင်းပယ်ခြင်းတွေကို ဘယ်လို ရင်ဆိုင်ကြမလဲ။ ဘယ်လို အသက်ရှင်ကြရမယ်ဆိုတဲ့အပေါ်ကို နားလည်စေဖို့ရာ ဘုရားရှင်ဖွင့်ပြပေးပါစေ။
ရှင်ယောဟန်ခရစ်ဝင် ၁:၁၁
သူသည်မိမိဒေသအရပ်သို့ကြွလာသော်လည်း၊ မိမိလူမျိုးတို့သည် သူ့ကိုလက်မခံဘဲနေကြ၏။
သခင်ယေရှုခရစ်တော်လည်း ငြင်းပယ်ခြင်းကိုခံခဲ့ရပါတယ်။ ဒါဟာ ပရောဖက်ပြုချက်ပြည့်စုံခြင်းတွေထဲက တခု ဆိုရင်လည်း မမှားပါဘူး။ ဟေရှာယ (၅၃:၃)ရဲ့ ပရောဖက်ပြုချက် ပြည့်စုံခြင်းကြောင့် အဲဒီငြင်းပယ်ခြင်းက ပရောဖက်ပြုချက်ပြည့်စုံခြင်းကို အထောက်အကူပြုနေတာကို မြင်တွေ့ရပါတယ်။ အဲဒီငြင်းပယ်ခြင်းအားဖြင့်လည်း ယေရှုခရစ်တော်ရဲ့ ကားတိုင်တက်ခြင်းကို ထောက်ပံ့ပေးနေပါတယ်။ လူ့အသက်ကို သတ်ခြင်း၊ ဓါးပြတိုက်ခြင်းတွေမှာ နာမည်ဆိုးနဲ့ကျော်ကြားတဲ့ လူဆိုးကြီး ဗာရဗ္ဗကိုသာ ရွေးချယ်ကြပြီး အပြစ်မရှိ၊ ဖြောင့်မတ်တဲ့ ယေရှုကို ငြင်းပယ်ကြခြင်းဟာ အော့နှလုံးနာ၊ ငိုကြွေးချင်စရာ၊ နာကျင်ခံစားရမှာတေ့ာ အမှန်ပဲဖြစ်ပါတယ်။ ဒါပေမဲ့လည်း အဲဒီငြင်းပယ်ခြင်းကပဲ ယေရှုခရစ်တော်ရဲ့ ရှင်ပြန်ထမြောက်ခြင်း၊ ကယ်တင်ခြင်းအစီအစဥ်အတွက် တစ်စိတ်တဒေသ အရေးကြီးအပိုင်းတခုဆိုရင်လည်း မမှားပြန်ဘူး။
ငြင်းပယ်ခြင်းမရှိရင် ကားတိုင်တက်ဖို့ရန်မရှိ။
ကားတိုင်တက်ခြင်းမရှိရင် အသေခံအသွေးသွန်းခြင်းမရှိ။
အသေခံခြင်းမရှိရင် ရှင်ပြန်ထမြောက်ခြင်းမရှိ။
ရှင်ပြန်ထမြောက်ခြင်းမရှိရင် အချည်းနှီးယုံကြည်ခြင်း မဟုတ်ပါလား။
ကယ်တင်ခြင်းလည်း မပြည့်စုံတော့ပါဘူး။
ဒါ့ကြောင့် အဲဒီငြင်းပယ်ခြင်းက အင်မတန် ပြည့်စုံကောင်းမွန်တဲ့ ဘုရားသခင်ဘုန်းတော်ထင်ရှားဖို့ တခုအပါအဝင်အဖြစ် ရှိနေပါတော့တယ်။ ငြင်းပယ်ခြင်းရဲ့ နောက်ကွယ်မှာလည်း မိမိတို့ လူသားတွေအတွက် ကယ်တင်ခြင်းကျေးဇူးတော်ကို ထောက်ပင့်ခြင်းပင်။
ရှင်မဿဲခရစ်ဝင် ၂၇:၂၁
ထို့ကြောင့် မြို့ဝန်မင်းသည်၊ ဤသူနှစ်ယောက်တို့တွင် သင်တို့သည်အဘယ်သူကို လွှတ်စေချင်သနည်း ဟု လူများကို တဖန်မေးသောအခါ၊ ဗာရဗ္ဗကို လွှတ်စေချင်ပါသည်ဟု လျှောက်ကြ၏။
ဒီလိုပါပဲ ကျွန်တော်တို့ ကြုံတွေ့ခံစားရတဲ့ ငြင်းပယ်ခြင်းတွေဟာ နာကျင်ခံစားရပေမဲ့လည်း သူ့ရဲ့နောက်ကွယ်ပိုင်းကို မြင်နိုင်စေဖို့ရာ ဘုရားရှင်ရဲ့ ကောင်းကြီးရှိပါစေ။
အခုချိန်မှာ
- သင်ဟာ အလုပ်အကိုင်တွေရဲ့ ငြင်းပယ်ခြင်းကို ခံနေရပါသလား
- ကျန်းမာရေး ပြန်ကောင်းလာစေဖို့ ငြင်းပယ်ခြင်း ခံနေရသလား
- စီးပွားရေးလား
- ပညာရေးလား စတဲ့ငြင်းပယ်ခြင်းတွေကို ခံစားနေရပေမဲ့လည်း အဲဒီငြင်းပယ်မှုကိုပဲ ရင်ဆိုင်ပြီး နောက်လာမယ့် အခွင့်အရေး၊ အကျိုးကျေးဇူးကို သင့်အသက်တာထဲမှာ ဘုရားသခင်ရဲ့ ဘုန်းတော်ထင်ရှားစေခြင်းတွေကို မြင်နိုင်ပါစေ။
ဒီလိုပါပဲ စာဖတ်သူဟာ ယုံကြည်သူခရစ်ယာန်တယောက် ဆိုရင်တော့ ငြင်းပယ်မှုကို နေ့စဥ် ကြုံတွေ့နေရမှာဖြစ်သလို၊ ငြင်းလဲ ငြင်းပယ်ရမှာ ဖြစ်ပါတယ်။ ဒါကတော့ မိမိကိုယ်မိမိ ငြင်းပယ်ခြင်းပဲဖြစ်ပါတယ်။
ယေရှုက ငါ၌ ဆည်းကပ်လိုသူဆိုရင် ငြင်းပယ်ပါဟုဆိုထားတဲ့အတိုင်း မိမိရဲ့ ဇာတိသဘောတွေကိုငြင်းပယ်တဲ့သူ ဖြစ်ပါစေ။
ရှင်လုကာခရစ်ဝင် ၉:၂၃
ထိုမှတပါး၊ လူအပေါင်းတို့အား မိန့်တော်မူသည်ကား၊ ငါ၌ဆည်းကပ်လိုသောသူဖြစ်လျှင် ကိုယ်ကိုကိုယ် ငြင်းပယ်ရမည်။ ကိုယ်လက်ဝါးကပ်တိုင်ကို နေ့တိုင်းထမ်း၍ ငါ့နောက်သို့လိုက်ရမည်။
နေ့စဥ် မိမိရဲ့ဖြစ်ချင်စိတ်၊ မိမိရဲ့ ငါဆိုတဲ့ အတ္တ၊ ဇာတိသဘောတွေကို ငြင်းပယ်အသက်ရှင်ပြီး ကိုယ့်လက်ဝါးကားတိုင်ကို ကိုယ်ထမ်းတဲ့သူတွေဖြစ်စေပါ။
သခင်ယေရှုခရစ်တော်ကိုသာ ဗဟိုပြုပြီး အသက်ရှင်တတ်ဖို့ ငြင်းပယ်ခြင်းကို လုပ်ကိုလုပ်ဆောင်ရမှာဖြစ်တယ်။ ငြင်းပယ်ခြင်းက တကြိမ်တခါတည်းမဟုတ်၊ နေ့စဥ်နေ့တိုင်း၊ အကြိမ်ကြိမ်အခါခါ ငြင်းပယ်ရမည်ဖြစ်ပါတယ်။ ငြင်းပယ်ခြင်းက နာကျင်စေမှာဖြစ်တယ်။
- ကိုယ်လုပ်ချင်တာ မလုပ်ရတဲ့ ခံစားမှု
- ကိုယ်ဖြစ်ချင်တာ မဖြစ်ရတဲ့ အလိုမကျမှု
- ကိုယ့်ခံစားချက်တွေ ဘေးဖယ်ထားကာ မြေမြှုပ်သင်္ဂြိုလ်ရတဲ့ နာကျင်မှုတွေကို ကြုံတွေ့ခံစားရနိုင်ပေမဲ့လည်း အဲဒီငြင်းပယ်ခြင်းရဲ့ နောက်ကွယ်မှာ ဝိညာဥ်ရေးရာ အသီးအပွင့်နဲ့ ဘုရားသခင်ရဲ့ဘုန်းတော်ထင်ရှားခြင်းကို သေချာပေါက် ပြန်လည်ရိတ်သိမ်းခွင့်ရမှာဖြစ်ပါတယ်။
ငြင်းပယ်ခြင်းတွေဟာ စိုက်ပျိုးစဥ်အခါမှာတော့ ငိုကြွေးရမှာပါ၊ နာကျဥ်ရမှာပါ။ နေ့စဥ်နေ့တိုင်း အကြိမ်ကြိမ်အခါခါ မျက်ရည်ကျပြီးတော့ ပင်ပန်ကြီးစွာနဲ့ ငြင်းပယ်ရခြင်းတွေဟာ တနေ့မှာတော့ ရွှင်လန်းစွာရိတ်သိမ်းခွင့် ရမှာဖြစ်တယ်ဆိုတာကို နားလည်စေချင်ပါတယ်။
ဒါ့ကြောင့် ကိုယ့်ကိုကိုယ်ငြင်းပယ်ပြီး ယေရှုခရစ်တော်ကို ဆည်းကပ်ကာ ငြင်းပယ်ခြင်းရဲ့နောက်ကွယ်မှာရှိတဲ့ အသီး အပွင့်ကို ရရှိပိုင်ဆိုင်နိုင်ကြဖို့ မိမိရဲ့ အသက်တာမှာ ဘုရားသခင်ရဲ့ ဘုန်းတော်ထင်ရှားခြင်း ရှိကြပါစေလို့ အနည်းငယ်တိုက်တွန်း ခွန်အားပေးလိုက်ပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
