ကျွန်တော်သည် ကော်ဖီကြိုက်နှစ်သက်သူတဦးဖြစ်ပြီး ဘလက်ကော်ဖီကို အင်မတန်ကြိုက်သည်။ သကြားမထည့်ထားသော ကော်ဖီတခွက်ကိုသောက်ရင်း ဆင်ခြင်မိသည်။ Coffeeလား Teaလားဟုဆိုရာတွင် မိမိတို့ကြိုက်နှစ်သက်ရာကို သောက်သုံးတတ်ကြမှာဖြစ်ကြပါတယ်။ Coffeeကြိုက်သူက Coffee၊ Teaဆိုသူက Tea ပေါ့။ ကယ်ဆမ်ကွေကာ ကြေညာလေးတခုကို မြင်ယောင်မိသည်။ ကယ်ဆမ်ကွေကာကို ကိုယ့်အတွေးနဲ့ကိုယ်သောက်သုံးကြပါတယ်တဲ့လေ။ သောက်လို့ရပါတယ်။ သို့သော် ယေရှုခရစ်တော်ကိုတော့ ကိုယ့်အတွေးနဲ့ကိုယ် ပိုင်းခြားခွဲခြား ယုံကြည်လို့မရဘူးဖြစ်တယ်။
ရှင်ယောဟန်ဩဝါဒစာ ဒုတိယစောင် ၁:၇
လူဇာတိအားဖြင့် ကြွလာတော်မူသော ယေရှုခရစ်ကို ငြင်းပယ်လျက်၊ လှည့်ဖြားသော သူအများတို့သည် လောကထဲသို့ဝင်ကြပြီ။ ထိုသို့သောသူသည် လှည့်ဖြားသောသူဖြစ်၏။ အန္တိခရစ်လည်းဖြစ်၏။
ယေရှုခရစ်တော်သည် လူ့ဇာတိအပြည့်အဝရှိသလို ဘုရားဇာတိအပြည့်အဝရှိပါတယ်။ ပရောဖက်ပြုချက်ပေါင်းများစွာဟာ ခရစ်တော်မပေါ်မှီကတည်းက ရှိခဲ့သလို၊ ပြည့်လဲ ပြည့်စုံခဲ့တယ်။ ကျမ်းစာမှာ အပြည့်အဝ ဖော်ပြထားတယ်ဆိုတာကို ကျမ်းစာကိုဖတ်သောသူသည် နားလည်ပါစေ။ ကယ်ဆမ်ကွေကာကို သောက်သုံးနေခြင်းမဟုတ်သောကြောင့် ကိုယ့်အတွေးနဲ့ကိုယ် ယေရှုကို ကိုင်လို့ရလို့၊ စကားပြောလို့ရလို့၊ ရောမစစ်သားတွေဖမ်းနိုင်လို့၊ နှိပ်စက်နိုင်လို့၊ ယေရှုက နာကျဥ်လို့၊ ငိုကြွေးလို့၊ ဆာလောင်လို့၊ သွေးထွက်လို့ စသဖြင့်ကြောင့်ဟုဆိုကာ လူဖြစ်တယ် ဘုရားမဟုတ်ဘူးလို့ ဆိုနေသူ၊ သွန်သင်နေသူဟာ သမ္မာတရားကို မသိသူ၊ ကျမ်းစာနားမလည်သူ၊ အယူလွဲမှားသော မိစ္ဆာဆရာသမားသာဖြစ်ပါတယ်။
ယေရှု၏ နာကျင်ခြင်းခံရမည်၊ သိုးသငယ်အလား စသဖြင့် ပရောဖက်ပြုချက်တွေရှိထားပြီးသားဖြစ်ပါတယ်။ ဒါကို နားလည်စေချင်ပါတယ်။ ထိုသို့သော အယူလွဲ မိစ္ဆာအယူဩဝါဒများမှာ ဟိုးအရင်ကတည်းကတည်ရှိခဲ့ကြပါတယ်။ ထိုအထဲမှ တခုကို ဖော်ပြပေးလိုက်ပါတယ်။
အာရိယပ်စ်ဝါဒ (Arianism)
စီအီး ၄၀၀ လောက်တွင် ရေပန်းစားလာခဲ့သော ဝါဒဖြစ်ပြီး၊ သခင်ယေရှု၏ ဘုရားဇာတိကိုငြင်းပယ်ပါတယ်။ ထိုအယူဝါဒကို အလက်ဇန္ဒြိယာမြို့မှ သင်းအုပ်ဆရာ အာရိယပ်စ် (Arius) စီအီး ၂၅၀-၃၃၆ ကစတင်ပြီး သူက သခင်ယေရှုသည် ဘုရားလည်းမဟုတ် လူလည်းမဟုတ်၊ လူနှင့်ဘုရားကြားတွင် ဆက်သွယ်ပေးသူအဖြစ် ဖန်ဆင်းထားသော ပုဂ္ဂိုလ်တပါးသာဖြစ်ကြောင်း သင်ကြားခဲ့သည်။ သူ၏ သွန်သင်ချက်တွင် ခရစ်တော်သည် လူထက်မြင့်ပြီး ဘုရားထက်နိမ့်သည်ဟု ယုံကြည်သည်။ ဘုရားဇာတိနှင့်လူ့ဇာတိ ပေါင်းစပ်ရောနှောခြင်းမရှိ၊ သခင်ခရစ်တော်၏ လူ့ဇာတိခံယူခြင်းမှာ ခေတ္တခဏသာ ဖြစ်သည်ဟု သွန်သင်သည်။ သူတို့သည် (ဖိ ၂း၆, ဗျာ ၁း၈) တွင် ဖော်ပြထားသော အရာများနှင့် ဆန့်ကျင်ပါတယ်။
အသနေးစီးယပ်စ် (Athanasius) စီအီး ၂၉၆-၃၇၃ က ထိုအယူအဆကို ဆန့်ကျင်ခဲ့သည်။ ခရစ်တော်သည် ရာနှုန်းပြည့် လူ့ဇာတိခံယူသကဲ့သို့ ဘုရားဇာတိလည်း ရှိသည်ဟူသော စစ်မှန်သည့် ယုံကြည်မှုကို ခံယူသည်။ ထို့ပြင် နိစိန်ကောင်စီ (Council of Nicea) စီအီး၃၂၅တွင် ထိုအယူဝါဒကို ငြင်းပယ်ခဲ့ကြသည်။ နောင်တွင် ထိုလွဲမှားသော အယူဝါဒများကို လူတို့မလိုက်သွားရလေအောင်၊ နိစိန်ယုံကြည်ချက် (Nicence Creed)ကို ကြေညာခဲ့ကြသည်။ ခရစ်တော်၏ ရာနှုန်းပြည့် ဘုရားဇာတိနှင့်လူ့ဇာတိတို့ကို ကာကွယ်သော ယုံကြည်ချက်တို့ကို ခေတ်အဆက်ဆက်မှ ယနေ့အထိ လက်ခံကျင့်သုံးခဲ့ကြသည်။
ထိုအယူလွဲတွေသည် ယနေ့တိုင်ရှိနေသေးသည်။ မိမိသည် ထိုယုံကြည်ချက်၊ ကျမ်းစာအခြေခံ၊ သမ္မာတရားနားလည်မှုသာ မရှိထားရင် ထိုသူတို့၏အယူ၌ လုံးလည်ချာလည်လိုက်ကာ အယူလွဲနိုင်သည်။ သူတို့သည် ယေရှုကလူဖြစ်တယ် ဘုရားဆို မနာဘူး၊ ဘုရားဖြစ်ပြီးနာရင် ညာတာ၊ ဘုရားမပြောနဲ့ သေတ္တာတော်ကို ကိုင်မိတာတောင် သေတယ်တွေ့လား ယေရှုက ကားတိုင်မှာထားခံရတယ် ဘုရားဆိုတာညာတာ စသဖြင့် တဖြည်းဖြည်း ဦးနှောက်ဆေးတတ်တယ် (Brain Wash)။ နာတတ်တယ် ငိုတတ်တယ်။ ဒါ့ကြောင့် ကားတိုင်ပေါ်ကယေရှုက လူ၊ ရှင်ပြန်ထမြောက်မှ ဘုရားဖြစ်တယ်၊ ဒါ့ကြောင့် ထမြောက်မှ ယေရှုခရစ်တော်ဖြစ်တယ် စသဖြင့် ပေါက်ပန်းလေးဆယ် ဩဝါဒတွေကို သွန်သင်တတ်ကြပါတယ်။ ဒီအရာတွေက အရမ်းနက်နဲတယ်၊ နက်နဲလွန်းလို့ ကျမ်းစာကျောင်းမှာတောင် မသင်ဘူး၊ ဒီလိုမျိုး ကယ်တင်ခြင်းသင်တန်းမှာမှ သင်ပေးတာ၊ ကိုယ်တောင် ဆယ်ခါလောက်ပြန်တက်မှ နားလည်တာ စသဖြင့်တွေနဲ့ပြောတတ်တယ်။
ကျွန်တော် တခုပြောချင်ပါတယ်။ သမ္မာတရားနှင့်ညီသော ကျမ်းစာကျောင်းသည် ထိုသို့ ဘယ်သောအခါမှ မသွန်သင်ပေးဘူးဖြစ်တယ်။ ထိုအယူလွဲသင်တန်းမှာသာ သင်တာဖြစ်ပြီးတော့ ထိုအယူကို သမ္မာတရားမသိသူတွေသာ လက်ခံတာဖြစ်ပါတယ်။ နှမြောစရာကောင်းတာကတော့ ထိုအယူလွဲဆရာ၏ သင်တန်းပေးခြင်းကို လက်ခံသော အသင်းတော်နှင့် သင်းအုပ်တို့၏ အသင်းသားများပင်ဖြစ်ပါတယ်။ ထိုအယူလွဲများသည် နယ်၊ ဘိန်းဖျက်စခန်း၊ ပြုပြင်ရေးစခန်း၊ တောရွာ၊ စသဖြင့် နုနယ်သူများအား အရမ်း ဦးနှောက်ဆေးတတ်ကြပါတယ်။
ဒါ့ကြောင့် False Teachers များကို လက်မခံကြဖို့နှင့် ထိုနေရာမှာပါဝင်မိလျှင် ထွက်ကြဖို့၊ ထိုသူလာသွန်သင်လျှင် လက်မခံဖိုရာ ပြတ်သားစွာ ငြင်းဆိုတတ်ပါစေ။ မိမိသင်းအုပ်ဆရာ/မ မှာ ထိုအယူတွင် ပါဝင်လက်ခံနေလျှင် ထားခဲ့လိုက်ပါဟုပြောပါရစေ။ အလင်းနှင့်အမှောင် အတူမနေဘူးဖြစ်တယ်၊ ဒါ့ကြောင့် သမ္မာတရား၌ ပြတ်သားစွာ ရပ်တည်ကြပါစို့။ ခရစ်ယာန်များ သမ္မာတရားကိုသိပြီး စစ်မှန်သော ကယ်တင်ခြင်းရသော သူများဖြစ်ကြပါစေဟု ပိုင်းခြားနားလည်တတ်စေရန် အနည်းငယ် ဝေမျှခွန်အားပေးလိုက်ပါတယ်။
ဘုရားရှင်ဆက်လက်စကားပြောပါစေ။
Ref: Systematic Theology
Titus Kyaw Nyi
(ဆောင်းပါးရှင် Titus Kyaw Nyiသည် ဓမ္မရေးရာစာစု မြောက်များစွာ ရေးသားနေသူ ဖြစ်သည့်အပြင် COVID-19ကပ်ဘေးအတွင်း "ဘုရားသခင် သုတ်ပေးသောမျက်ရည်" စာအုပ်တအုပ် ရေးသားထုတ်ဝေထားသည့် လူငယ် စာရေးဆရာတဦးလည်း ဖြစ်သည်)
