ငြိမ်သက်နေတဲ့ ကန်ရေပြင်ထဲကို ခဲတလုံးကို ပစ်ချလိုက်တဲ့အခါမှာ ကျတဲ့နေရာတင်မကပဲ ဘေးဘက်ကန်ရေပြင် အတိုင်းအတာတခုအထိ ဂယက်ရိုက်သွားနိုင်သလို၊ ကျတဲ့နေရာသာဖြစ်တာပါလို့ ဆိုလို့မရဘူးလို့ နားလည်ရတယ်။ မယုံရင် စမ်းပစ်ကြည့်ကြပါလို့ ပြောချင်ပါတယ်။ ဘေးပတ်ပတ်လည်မှ ရေပြင်လည်း သက်ရောက်မှုရှိတယ်၊ လှုပ်ခပ်သွားတယ်၊ ထိတဲ့နေရာတင်မဟုတ်ဘူး၊ သက်ရောက်မှုတခုဆိုတာရှိတယ်ဆိုတာကို မြင်တွေ့ရလိမ့်မယ်။ သက်ရောက်မှုတခု (Impact)သည် မည်သို့ပင် ဝေးနေပါစေ အနည်းနှင့်အများရှိနေသည်။
ဒီလိုပါပဲ နိုင်ငံရေးဆိုင်ရာကြည့်ရရင် အရင်ခေတ် အဆက်ဆက်တွေက ဘယ်လိုသက်ရောက်မှုဖြစ်စေခဲ့ကာမူ လူတိုင်းကို သက်ရောက်စေတယ်။ ဆိုကြပါစို့ အဘိုးအဘွား ကြုံခဲ့ရမယ်၊ သင်ကိုယ်တိုင် မကြုံရရင်တောင် သူတို့ရဲ့ ခံစားခဲ့ရတဲ့ သက်ရောက်မှု တခုတော့ရှိတယ်၊ တီဗွီမှာလာတဲ့ ကိုရီးယားရုပ်ရှင်တခုကို ဥပမာကြည့်ရရင် နိုင်ငံရေးလုပ်တဲ့ သူတွေရဲ့ ဆွေစဥ်မျိုးဆက် ဒုက္ခရောက်အောင် လုပ်ပြစ်တာမျိုး၊ ကလေးတွေ မလုပ်ဘူးဆိုပေမယ့် သူတို့တွေမကြုံရပေမယ့် နောက်ဆက်တွဲ သက်ရောက်မှုတခုလို့ ဆိုကြပါစို့။ ဒီလိုပါပဲ နိုင်ငံတိုင်းမှာဖြစ်တတ်တယ်၊ နာဇီတွေဆိုရင်လည်း အင်မတန်ဆိုးခဲ့တယ်၊ နပိုလီယံစသဖြင့် ဥပမာတွေရှိခဲ့တယ်။ လက်လွတ်စလွယ် သင်မခံစားရဘူးဆိုတာမျိုး မတွေးဘဲနဲ့ ပြန်လည် ချိတ်ဆက်ကြည့်ရရင် ရှေ့က ဘယ်လို သက်ရောက်မှုမဆို နောက်မျိုးဆက်ကို သက်ရောက်စေတယ်။ ဒီသက်ရောက်မှု(Impact)ဟာ အခြေအနေမည်သို့ဖြစ်နေပါစေ၊ ကာလတွေမည်မျှကြာခဲ့ပါစေ၊ ဆွေမျိုးသားချင်း အသိမိတ်ဆွေ မည်သို့ပင်ဝေးနေပါစေ၊ ဖျက်ဆီးလို့မရအောင် သက်ရောက်မှုရှိခဲ့တယ်ဆိုတာကတော့ ဖျောက်ဖျက်လို့မရတဲ့ သမိုင်းတခုပင်။ ဘာဖြစ်လို့လဲဆိုရင် နိုင်ငံသားတိုင်းနဲ့ နိုင်ငံရေးဟာ သက်ဆိုင်နေသောကြောင့်သာ။ ဒါကတော့ လောကရေးရာ အခြေခံနိုင်ငံရေး သဘောတခုပင်။
ရောမဩဝါဒစာ ၅:၁၅
သို့သော်လည်း၊ ပြစ်မှားခြင်းသဘောနှင့် ကျေးဇူးတော်သဘောမတူ၊ အကြောင်းမူကား၊ လူတယောက်သည် ပြစ်မှားသောအားဖြင့်၊ လူများတို့သည် သေခြင်းသို့ ရောက်ကြ၏။ တယောက်သောသူတည်းဟူသော ယေရှုခရစ်အားဖြင့် ဘုရားသခင်၏ ကျေးဇူးတော်နှင့် ကျေးဇူးတော်၏ အကျိုးသည်လူများတို့၌သာ၍ ကြွယ်ဝပြည့်စုံ၏။
တစ်ယောက်သောသူ၏ ပြစ်မှားခြင်း၊ မနာခံခြင်းမှသည် သေခြင်းတရားဝင်ရောက်ခဲ့သလို၊ တစ်ယောက်သောသူ၏ နာခံခြင်းအားဖြင့် ထာဝရအသက်ကို ရရှိတယ်။ ဒါဟာလည်း တယောက်သောသူရဲ့ သက်ရောက်စေတဲ့ အရာတခုပင်ဖြစ်နေပေတယ်။ နိုင်ငံရေးအလားမြင်ရမယ်ဆိုရရင် တိုင်းပြည်တစ်ခုမှာ ခေါင်းဆောင်တစ်ယောက်၊ အဖွဲ့အစည်းတခုရဲ့ မှားယွင်းမှုနဲ့ ကောင်းမွန်ခြင်းတခုစီတိုင်းရဲ့ သက်ရောက်မှုတခုစီတိုင်းက လူတိုင်းအပေါ်သက်ရောက်သလို ယေရှုခရစ်တော်ရဲ့ ကယ်တင်ခြင်းဟာ လူတိုင်းအပေါ် သက်ရောက်စေတယ်လို့ နားလည်စေတယ်။
နိုင်ငံရေးဟာ နိုင်ငံသားတိုင်းနဲ့သက်ဆိုင်သလို၊ ယုံကြည်သူတိုင်းနဲ့ ဘုရားသခင်ရဲ့နိုင်ငံတော်အရေးကလည်း သက်ဆိုင်နေတယ်။ ယုံကြည်သူတိုင်းဟာ နိုင်ငံတော်အတွက် တစ်ထောင့်တနေရာက ပါဝင်လုပ်ဆောင်ရမယ်၊ ဧဝံဂေလိသတင်းစကား ဝေငှခြင်းအားဖြင့်သော်၎င်း၊ အမျိုးမျိုးသော အဖိုးအခများအားဖြင့်လည်း ပါဝင်သင့်တာကို နားလည်ရပါမယ်။
အချုပ်အားဖြင့်ဆိုရရင် တစ်ဦးတယောက်၊ ပါတီ၊ အဖွဲ့အစည်း၊ အစိုးရ၊ ဘုရင် စသူတွေရဲ့ ဆိုးခြင်း၊ ကောင်းခြင်း တစ်ခုစီတိုင်းဟာ လူတိုင်းအပေါ်ကို သက်ရောက် တယ် (ထိုသူ ငယ်သည်ဖြစ်စေ၊ မမွေးသေးသည်ဖြစ်စေ)၊ သမိုင်းကိုဖျောက်လို့မရသလို၊ ဒီလိမျိုးပဲ ယေရှုခရစ်တော်ရဲ့ ကယ်တင်ခြင်းကျေးဇူးတော်ဟာ ကမ္ဘာလောကသား တစ်ဦးတယောက်စီတိုင်းအပေါ်ကို သက်ရောက်စေတယ်၊ တကယ်ကို ဟုတ်သလားဆိုတဲ့ အထောက်အထားသမိုင်းများစွာဟာ တည်ရှိနေရုံမကသေးပဲ၊ လက်ရှိကျွန်ုပ်တို့ အသုံးပြုနေတဲ့ ခုနစ်(AD)ကို ကြည့်ခြင်းအားဖြင့် ထိုသမိုင်းကြောင်းကို ပြန်လည်မြင်ယောင်နေမိပါတယ်လို့မေတ္တာဖြင့်ဖော်ပြလိုက်ပါတယ်။
AD (Anno Domini) လို့ခေါ်သော (In The Year Of The LORD) သခင်ဘုရား၏နှစ်များဟု အနီးစပ်ဆုံး ပြန်ဆိုရပါမယ်။ ဒီနှစ်ထဲမှာ လူတိုင်းအပေါ်ကို ဘယ်အရပ်ကဖြစ်နေပါစေ သက်ရောက်နေပါတယ်၊ သက်ဆိုင်နေပါတယ်။ ဒါ့ကြောင့် လူသားတိုင်းသည် သခင်ယေရှုခရစ်တော်၏ ကယ်တင်ခြင်းကျေးဇူးတော် ပြုပေးခဲ့ခြင်းသည် လောကီသားများ အားလုံးအပေါ်သို့ သက်ရောက်မှုရှိနေပေတာကြောင့် (Impact) သက်ရောက်မှုလို့ ရှုထောင့်တမျိုးနဲ့ အဓိပ္ပါယ်တခု ဖွင့်ဆိုလိုက်ရပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
