ပြန်လည်သင့်မြတ်စေခြင်းသည် ခေါင်းဆောင်တယောက်အတွက် အရေးပါသော အရာတခုအဖြစ် အပါအဝင်ဖြစ်သည်။ ဆိုကြပါစို့ လုပ်ငန်းခွင်တွင် လူနှစ်ဦး မသင့်မြတ်သည်ကို ကြားဝင်ဖြေရှင်းပေးသော ရာထူးကြီးသူ၏ မည်သို့ဖြေရှင်းသည်ဟူသောအရာသည် အရေးပါလှသည်။ ထိုသူနှစ်ဦးအဆင်ပြေသွားမလား၊ နောက်ထပ်ရန်ဖြစ်စရာရှိဦးမလား၊ သို့မဟုတ် လုံးဝမတည့်တော့ဘူးဖြစ်မလားဆိုတာတွေသည် ဖြေရှင်းပေးသူအပေါ် မူတည်နေသည်။ ထိုအရာသည် လုပ်ငန်းခွင်အပေါ်သို့ သွယ်ဝိုက်၍သော်၎င်း၊ တိုက်ရိုက်သော်၎င်း အကျိုးသက်ရောက်စေသည်။
ဖိလေမုန်ဩဝါဒစာကို လေ့လာကြည့်မည်ဆိုလျှင် ရှင်ပေါလု၏ ပြန်လည်သင့်မြတ်စေခြင်းငှာ ညှိနှိုင်းဆောင်ရွက်ခြင်း (Reconciliation) ကိုမြင်တွေ့ရသလို၊ ခေါင်းဆောင်ဖြစ်သော်လည်း နှိမ့်ချခြင်း၊ ချစ်ခြင်းမေတ္တာနှင့်တကွ စိတ်ရှည်ရှည်နှင့် ဖြစ်စဥ်ကိုရှင်းပြခြင်း၊ ကိုယ်စားပြုတောင်းပန်ပေးခြင်းကို ထင်ရှားစွာမြင်တွေ့ရသည်။ မိမိကိုယ်တိုင် ထောင်ထဲတွင်ရှိနေသော်လည်း မိမိအရေးထက် သူတပါးရန်ငြိမ်းစေရေးကိုသာ၍ အလေးပေးခြင်းကို အတုယူဖွယ်မြင်ရသလို၊ မိမိနားတွင် မိမိကိုပြုစုပေးနေသောသူကို ဖိလေမုန်ထံပြန်စေခြင်းသည် မိမိအဆင်ပြေခြင်းထက် သူတပါးကိုသာ၍ အလေးထားသူဖြစ်ကြောင်းကိုမြင်တွေ့ရသည်။
(မှတ်ချက် ။ ။ ကျမ်းညွှန်း - ဖိလေမုန်)
ဩနေသိမ်သည် ဖိလေမုန်၏ကျွန်ဖြစ်သည်။ သူသည် အမှုတခုကြောင့် ထွက်ပြေးရင်း အဖမ်းခံရသည်။ (သူ့သခင်ဆီမှ ငွေ/ပစ္စည်းတခုခုခိုးယူ၍ ထွက်ပြေးသည်ဟု အမျိုးမျိုးယူဆကြသည်။) ရှင်ပေါလုနှင့်အတူ ထောင်ထဲတွင်တွေ့ဆုံရသူလည်းဖြစ်သည်။ ထိုမှတဆင့် ရှင်ပေါလု၏သွန်သင်ခြင်း၊ ဧဝံဂေလိသတင်းစကားအားဖြင့် ခရစ်တော်ကို လက်ခံပြီး အသက်တာပြောင်းလဲသွားခဲ့သည်။ အစပိုင်းတွင် ဖိလေမုန်နှင့်ဩနေသိမ်တို့၏ ဆက်ဆံရေးသည် မပြေလည်ခဲ့ကြချေ၊ ထိုရန်ကို ငြိမ်းစေဖို့ရန် ရှင်ပေါလု၏ ရင်ကြားစေ့ရေး အစီအစဥ်သည် ကျွန်တော်တို့အတွက် ယေရှုခရစ်တော်၏ ကားတိုင်တော်တရားကို ပြန်လည်မြင်ယောင်စေသည်။ ထိုလူသုံးဦး၏ အမြင်နှင့် ခံစားချက်အချို့ကိုလည်း အနည်းငယ်မြင်ယောင်ကြည့်ရအောင်လား။
ကျွန်ပြေးဖြစ်သော ဩနေသိမ်သည် ဥပဒေအရစီရင်ခြင်းကို ခံရမည်သာမက၊ ဖိလေမုန်ဆီပြန်သွားလျှင် မည်မျှမျက်နှာငယ်ရမည်နည်း၊ အခြားကျွန်များ၏ မည်သို့အပြစ်တင်ဝေဖန်မှုကို သူခံရဦးမည်ကို သူ့အနေဖြင့် ရင်ဆိုင်ချင်မည်မဟုတ်ချေ။ ဖိလေမုန်ကရော သူ့ကို လက်ခံချင်ပါ့မလား။ အသက်တာပြောင်းလဲတာကို ယုံနိုင်ပါ့မလား။
ဖိလေမုန်၏ စိတ်ထဲတွင် ဩနေသိမ်ကို နောက်တဖန် အခွင့်အရေးပေးချင်ပါ့မလား။ ဒီလူ ဒီအကျင့် ဒီအချိုးအတိုင်းသာဆိုလျှင် လက်ခံဖို့ဖြစ်နိုင်ပါ့မလား။ ကျွန်အနေနှင့်တောင်ထွက်ပြေးသေးတာ ညီအကိုလို၊ ခရစ်တော်၌သာညီအကိုလိုဆိုရင် သူတကယ်အသက်တာ မပြောင်းလဲခဲ့ရင် ဖြစ်ပါ့မလား။
ပေါလုသည် ထိုခေတ်ထိုအချိန်၏ ရေခံမြေခံသဘောသဘာဝကြောင့် ကိုယ်တိုင်ဖွင့်မပြောသော်လည်း ကျွန်စနစ်ကို ကြိုက်သည်မဟုတ်ဟု ကျွန်တော်ယူဆမိသည်။ သူ့အတွက်တော့ ဩနေသိမ်ကို ဖိလေမုန်နှင့် ပြန်လည်သင့်မြတ်စေဖို့ရာ ညှိနှုင်းပေးရခြင်းသည် အသေးစိတ်ဆန်လွန်းသည်၊ သတိထားရသည်၊ ကျွန်စနစ်ခေတ်စားသောအချိန် ဖြစ်သောကြောင့် ထိလွယ်ရှလွယ်ဖြစ်နိုင်သည်။
ထိုမျှမက နှိမ့်ချ၍ပြောဆိုခြင်း၊ ကိုယ်စားပြုတောင်းပန်ခြင်း၊ အပြစ်တင်စရာရှိရင် ငါ့သာတင်ပါဟုဆိုခြင်းတွေသည် ခေါင်းဆောင်းကောင်းတစ်ယောက်၏ အတုယူစရာအချက်တွေထဲမှ တစ်ချို့ဖြစ်သည်။ ဩနေသိမ်၏အသက်တာ ပြောင်းလဲသည်ကို ရှင်ပေါလုတကယ်ကို ယုံတယ်ဆိုတာကို မြင်ရသောကြောင့် အကျင့်ပါသော ယုံကြည်ခြင်းဖြစ်ကိုဖြစ်ရမည်။ သို့မှသာ သူတပါးမြင်ရသော ယုံကြည့်ခြင်းဖြစ်မည်၊ ထိုမှထပ်ဆင့်၍ ရှင်ပေါလုသည် ဖိလေမုန်ကို အာမခံရဲပေတော့မည် မဟုတ်ပါလား။
ဆက်ဖတ်ကြည့်မည်ဆိုလျှင် ကျွန်ကိုပြန်ရသလိုမဟုတ်ဘဲ ညီအစ်ကိုရတယ်လို့သိမှတ်ပါ၊ ညီအစ်ကိုလိုဖြစ်စေဖို့ ခဏကွာတယ်လို့မှတ်ပါ၊ ငါ့ကိုလက်ခံသလို လက်ခံပါ၊ သူမင်းကို ပြစ်မှားရင် သူ့ဆီကအကြွေးတစ်ခုခုရစရာရှိရင် ငါ့ဆီမှာ မှတ်ပါ စသဖြင့် အနစ်နာခံ နှိမ့်ချ၍ပြောဆိုခြင်း၊ အာဏာတွေ ပါဝါတွေဆိုတာ ဘာမှန်းမသိအောင်ပင် အဆိပ်ကင်းသော ခေါင်းဆောင်၏ အပြောအဆိုကို မိမိတို့ ယုံကြည်သူတွေအတုယူသင့်သည်။
အနေသာကြီးပဲ နေစမ်းပါလားဟု ပြောစရာရှိသော်ငြားလည်းပဲ ပြန်လည်သင့်မြတ်စေခြင်းငှာ ညှိနှိုင်းဆောင်ရွက်ခြင်း (Reconciliation) ရင်ကြားစေ့ဆောင်ရွက်ခြင်းသည် ယုံကြည်သူတွေနှင့်လည်း သက်ဆိုင်သည်ကို မြင်တွေ့ရသည်။ အဘယ့်ကြောင့်ဆိုသော် ဧဝံဂေလိတရားကိုယ်၌ပင် ရန်ငြိမ်းခြင်းတရားဖြစ်သည်။ သခင်ယေရှုခရစ်တော်ပင်လျှင် လူနှင့်ဘုရား မိဿဟာရဖြစ်စေရန် (Reconciliation) လုပ်ပေးခဲ့သူဖြစ်သည်။
အချုပ်အားဖြင့်ဆိုသော် မိမိတို့ယုံကြည်သူအယောက်စီတိုင်းသည် ဖိလေမုန်ဩဝါဒစာစောင်မှ ပြန်လည်သင့်မြတ်စေသောခေါင်းဆောင်၊ ပြန်လည်အခွင့်အရေးပေးသော ဖိလေမုန်၊ စစ်မှန်သော နောင်တနှင့်အသက်တာကိုပြုပြင်သော ဩနေသိမ် တို့၏အတုယူစရာများကိုဆင်ခြင်ရင်း ရန်ငြိမ်းခြင်းတရားဖြစ်သော ဧဝံဂေလိတရားကိုလည်း ပြန်လည်ဝေမျှကြဖို့ရန် အနည်းငယ်တိုက်တွန်းခွန်အားပေးလိုက်ပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
