ခေါင်းဆောင်ကောင်းတစ်ယောက်ဟာ မိမိရဲ့အမှားကို သုံးသပ်နိုင်ရမယ်။ နောက်တစ်ဖန်ထပ်မမှားဖို့ ပြုပြင်တတ်ရမယ်။ မိမိရဲ့အမှားကိုမသိရင်တောင် သူတပါးရဲ့ ထောက်ပြဖော်ပြခြင်းကို လက်ခံသောသူဖြစ်ရမယ်။ မိမိရဲ့အပြစ်ကို စစ်မှန်သောနောင်တရပြီး ဝန်ခံတတ်သောသူဖြစ်ရမယ်ဆိုတာကို ဒါဝိဒ်မင်းကြီးရဲ့အသက်တာကိုကြည့်ရင်း အတုယူနိုင်ပါတယ်။
ဒါဝိဒ်မင်းကြီးဟာ ဗာသရှေဘနဲ့မှားယွင်းခြင်းအမှုကို ပြုမိတဲ့အပေါ်မှာ ပရောဖက်နာသန်၏ အပြစ်ဖော်ပြခြင်းကိုခံရပါတယ်။ ဒါကို သူဟာနားလည်တယ် လက်ခံတယ််။ မိမိရဲ့အမှားကို စစ်မှန်သောနောင်တရတယ်ဆိုတာကို နားလည်ရပါတယ်။ ငါဟာဘုရင်ဖြစ်တယ်။ ဒါကြောင့်လာမပြောနဲ့ ငါလုပ်တာအမှန်လို့မဆိုပေ။ အခြားသောဘုရင်တွေလို မိမိရဲ့အမှားကိုဖော်ပြသော ပရောဖက်တွေကို ဖမ်းချုပ်ထောင်ချ အပြစ်ပေးတာတွေမလုပ်တာကို တွေ့ရတယ်။ ကျွန်တော်တို့ကလည်း ငါကခေါင်းဆောင်ပဲ၊ မန်နေဂျာပဲ၊ သူဌေးပဲ၊ လုပ်ငန်းမှာရှယ်ရာအများဆုံးသူပဲ၊ အသင်းတော်မှာဘာရာထူး၊ မိသားစုထဲမှာပင်ဖြစ်စေ စသဖြင့် မာနတွေဖယ်ရှားကာ အပြစ်ဖော်ပြခြင်းခံရရင် နှိမ့်ချသောစိတ်နဲ့ ဒါဝိဒ်မင်းကြီးကဲ့သို့ ဆင်ခြင်တတ်သောသူဖြစ်စေဖို့အရေးကြီးပါတယ်။
ဓမ္မရာဇဝင် ဒုတိယစောင် ၁၂:၁၃
ဒါဝိဒ်ကလည်း၊ ငါသည် ထာဝရဘုရားကို ပြစ်မှားပါပြီဟု နာသန်အားဝန်ချ၍ နာသန်က၊ အသက်တော်ကို ချမ်းသာစေခြင်းငှာ၊ တာဝရဘုရားသည် ကိုယ်တော်အပြစ်ကို ပယ်တော်မူပြီ။
ဒါဝိဒ်မင်းကြီးသည် သူမှားယွင်းခြင်းကို ဝန်ချတယ်ဆိုတာကိုတွေ့ရသလို နောက်တဖန်ထပ်တူညီသော အမှားမျိုးမတွေ့ရ။ ထို့ကြောင့် သူသည် စစ်မှန်သောနောင်တရကာ အသက်တာကို ပြင်ဆင်သည်ကိုတွေ့ရတယ်။ ကျွန်တော်တို့ကတော့ နောင်တလို့သာပြောကာ ခနနေပြန်မှားလိုက် ဘုရားသခင်က ခွင့်လွှတ်ပြီးသားပြောလိုက်၊ မေတ္တာရှင်ပြောလိုက်၊ တခါခွင့်လွှတ်တာ အားလုံးပါသွားပြီ အခုအပြစ်ရော နောက်လုပ်မယ့်အပြစ်ရောမရှိတော့ဘူး ဒါ့ကြောင့် လုပ်ချင်တာလုပ်တယ်ဆိုလို့ဆိုနှင့် ကယ်တင်ခြင်းနှင့်ခရစ်ယာန်အသက်တာကို နားမလည်သောသူတွေဖြစ်နေကြပြန်တယ်။ ဒီလိုပါပဲ တချို့ကလဲ ဒါဝိဒ်မင်းကြီးသည် ဗာသရှေဘနဲ့ဖောက်ပြန်မှားယွင်းပြီးနောက်မှာဟုဆိုကာ (ဆာလံ ၃၂:၁)ကို လိုရာပြန်ဆွဲသုံးခြင်းကိုမြင်ရပြန်တယ်။ နောက်ပိုင်း အခန်းတစ်ခုလုံးကိုဆက်ကြည့်သင့်ပေသည်။
ဆာလံကျမ်း ၃၂:၁
အပြစ်မှလွှတ်ခြင်း၊ ဒုစရိုက်အပြစ်ကို ဖုံးအုပ်ခြင်းသို့ ရောက်သောသူသည် မင်္ဂလာရှိ၏။
အခန်းငယ်(၃)မှာတော့ အပြစ်မဖော်ပြဘဲနေတဲ့အခါမှာဆိုပြီး ဒီလိုဆက်ဖော်ပြပါတယ်။ အပြစ်ဖုံးတယ်ဆိုတာနဲ့မပြီးပေ။ ချိတ်ဆက်ကြည့်မယ်ဆိုရင် ဒါဟာ အပြစ်ဝန်ချပြီးတဲ့နောက် ဘုရားသခင်၏ ခွင့်လွှတ်ခြင်း၊ အပြစ်ကိုဖုံးအုပ်ခံရတာကို မင်္ဂလာဟုဆိုခြင်းဖြစ်သည်။ အပြစ်ဝန်မချဘဲ ဖုံးအုပ်တာကို မင်္ဂလာဟုမဆိုတာကိုနားလည်ရပါတယ်။
ဆာလံကျမ်း ၃၂:၃
ငါသည် အပြစ်ကိုမဖော်မပြဘဲ နေစဉ်အခါ၊ တစ်နေ့လုံး ညည်းတွားသောအားဖြင့်၊ ငါ့အရိုးတို့သည် ဆွေးမြေ့ခြင်းသို့ ရောက်ကြ၏။
တကယ်တော့ ဒါဝိဒ်မင်းကြီး ခံစားရတာတွေမနည်းပါ။ သူစိုက်တဲ့အတိုင်း သူ၏အဖိုးအခတော့ရှိတယ်ဆိုတာကိုနားလည်ရပါတယ်။ သူ့ရဲ့သားလေးသေရတယ်။ သူနာကျဥ်ခံစားရတယ်။ သားလုပ်သူ၏သစ္စာဖောက်ခြင်းပုန်ကန်ခြင်း စသဖြင့် များစွာရိတ်သိမ်းရသေး၏။
ဓမ္မရာဇဝင် ဒုတိယစောင် ၁၂:၁၀
ယခုမှာသင်သည် ငါ့ကိုမထီမဲ့မြင်ပြု၍ ဟိတ္တိလူ၊ ဥရိယ၏မယားကို သိမ်းသောကြောင့်၊ သင့်အဆွေအမျိုးတို့သည် ဓားဘေးနှင့်အစဉ် တွေ့ကြုံရကြလိမ့်မည်။
ဒါ့ကြောင့် ခေါင်းဆောင်တယောက်သည် မိမိ၏ အမှားကိုသုံးသပ်ရမည်။ ကိုယ်မှားတာကို ကိုယ်မသိတာတွေရှိတတ်သောကြောင့်လည်း သူတပါးထောက်ပြခြင်းကို နားထောင်ရမည်။ ပြန်လည်ဆင်ခြင်ကာ ချက်ခြင်းစစ်မှန်သောနောင်တရကာ ဝန်ခံသင့်သည်။ ထပ်တူအမှားမျိုးကိုမဖြစ်စေသော ခေါင်းဆောင်တစ်ယောက်ဖြစ်သင့်ပေသည်။ ဝိညာဥ်ရေးရာခေါင်းဆောင်ဆိုလျှင် သာ၍ သတိထားကာ ဆင်ခြင်ရမည်ဖြစ်ပြီး မိမိ၏အမှားအလိုက် စိုက်သည့်အတိုင်းတော့ ရိတ်ရမည်ကိုသိရမည်။ အမှားကို မဝန်ခံချင်သောကြောင့် သမ္မာတရားကို မုသာနှင့်မသုံးသင့်ပေ။
ဒီအပိုင်းတွင် ဒါဝိဒ်မင်းကြီး၏ အသက်တာမှ သူ၏ စစ်မှန်သောနောင်တရတတ်မှု၊
သူတပါးမှအပြစ်ဖော်ပြခြင်းကိုနားထောင်ကာ ပြန်လည်ဆင်ခြင်မှု၊
ထပ်တူအမှားမျိုးမရှိမှု၊
ဘုရားသခင်ကိုကြောက်ရွံ့မှု၊
ဘုရားသခင်အား မိမိ၏အမှားကိုဝန်ချသောအမှုစသော ခေါင်းဆောင်ကောင်းတစ်ယောက်၏ အတုယူစရာများကိုမြင်တွေ့ရသလို ဘုရားသခင်သည် ခွင့်လွှတ်သော်လည်း မိမိအမှားမှ မိမိစိုက်သည့်အတိုင်းပြန်လည်ရိတ်သိမ်းရခြင်းကိုလည်း မြင်တွေ့ရသောကြောင့်အနည်းငယ်ပြန်လည်ဝေမျှခွန်အားပေးလိုက်ပါတယ်။
ဘုရားရှင်ဆက်လက်စကားပြောပါစေ။
Titus Kyaw Nyi
